2019-11-25 [11:35 AM]

چەندین ھۆکاری جیاواز بۆ لەرزینی ئۆتۆمبێل لەکاتی وەستاندا ھەن، ئەم کێشەیەش پێویستی بە چارەسەرکردن ھەیە.

پەیجی ڕادیۆی فەرمیی بەڕێوەبەرایەتیی ھاتوچۆی سلێمانی ھۆکارەکانی لەرزینی ئۆتۆمبێلی لەکاتی وەستاندا بڵاو کردووەتەوە، کە بریتین لە:

- پیسبوونی ڕۆنی ئۆتۆمبێل، کاتێک ڕۆنی ئۆتۆمبێل زۆر پیس دەبێت، دەبێتە ھۆی لەرزینی بزوێنەر.

- تێکچوونی لاستیکی ئەو پارچەیەی کە بزوێنەری بەستووەتەوە بە ئۆتۆمبێلەکەوە کە پێی دەگوترێت (قوڵاغ)، ئەمەش دەبێتە ھۆی لەرزینی ئۆتۆمبێل لەکاتی وەستاندا.

- لاوازبوونی پاتری یان دینەمۆ، ئەگەر ھەستت بەوە کرد لە کاتی کارپێکردنی لایتەکان یان سەروخوارکردنی جامەکان لەرزینەکە زیاد بوو، ئەوا کێشە لە پاتری، یان دینەمۆکەدایە، یان پاترییەکەت لاوازە.

- کێشەی پلاکەکان، زۆر کات کۆنیی پلاکەکان، یان ھەڵە بەستنیان لەرزین دروست دەکەن.

- کێشەی نۆزڵەکان، پیسبوونی نۆزڵەکان، یان ھەر کێشەکی دیکە لە نۆزڵەکان ھەبێت، ئەوا دەبێتە ھۆی لەرزینی ئۆتۆمبێل لەکاتی وەستاندا.

- تێکچوونی پستۆنەکان، ھەر کێشەیەک لە پستۆنەکان ھەبێت، ئەوا دەبێتە ھۆی لەرزینی ئۆتۆمبێل لەکاتی وەستاندا.