2019-10-22 [12:06 PM]

بەڕێوەبەرایەتیی گشتیی کەشناسی و بوومەلەرزەزانیی ھەرێمی کوردستان، چۆنیەتیی خۆپاراستن لە لێدانی برووسکی بڵاو کردەوە.

ئەمڕۆ سێشەممە ٢٢/١٠/٢٠١٩، بەڕێوەبەرایەتیی گشتیی کەشناسی و بوومەلەرزەزانیی ھەرێمی کوردستان، لە ماڵپەڕی فەرمیی خۆی، چۆنیەتیی خۆپاراستن لە لێدانی برووسکی بڵاو کردەوە، تێیدا ئاماژە بەوە دراوە، زۆر جار وا ڕێک دەکەوێت لەکاتی نزیکبوونەوەی گێژەڵووکەی برووسکدا لە دەرەوەی ماڵدا بیت، بەم ڕێکارانە خۆت لە لێدانی برووسک بپارێزە:

* دەستبەجێ تەلەفۆن و مۆبایلەکەت دابخە.

* ئەگەر لەژێر یان، نزیک دارێکی درێژ و تەنیا بووی، خێرا لێی دوور بکەوە.

* لە نزیک ستوونەکانی کارەبا و تەلەفۆن و تاوەرەکانی پەیوەندی و گەیاندن دوور بکەوە.

* لە شوێنی بەرز مەوەستە.

*ئەگەر لە ناوچەیەکی کشتوکاڵی بیت، ئەو کاتە تا بکرێت دوور بکەوە کە لەو شوێنانەی کە داری بەرزی لێیە، ھەوڵبدە بگەیتە ناوچەیەکی دەشتایی و نزم کە درەختی باڵا نزمی لێ بێت.

* تا بکرێت نەچیتە ڕووبەرە کراوەکان، ئەگەر بە ناچاری لە شوێنێکی وا بوویت، دەستبەجێ لەسەر ڕووی زەوی پاڵکەوە، یان لایەنی کەم دابنیشە و نەڕۆیت تا گێژەڵووکەکە دوور دەکەوێتەوە، یان کۆتایی دێت.

* لە کەلوپەل و ئامێری ئاسنینی وەک تەلبەندەکان و ھەرچی جۆرە بارستە کانزایەکی کەڵەکەبوو بێت، دوور بکەوە.

* لە کەناراوەکانی وەک دەریا و دەریاچەکان و چەم و ناوچە شێدارەکان دوور بکەوە.

* بەکارنەھێنانی ئامێرە کارەباییەکان لە دەرەوەی ماڵەوە و لەکاتی نزیکبوونەوەی گێژەڵووکەی برووسک.

* خێرا ئاریەلی ئۆتۆمبیلەکەت دابەزێنە.

* ئەگەر لەناو ئۆتۆمبیل بوویت، ئەوا دامەبەزە، چونکە پەیکەری ئۆتۆمبیلەکەت جۆرێک لە پارێزگاریت پێ دەبەخشێ.