|
نڤیسینا:غیاس خالد زێبارى دیدار و كۆربه‌ند و كۆنفرانسێن نیڤده‌وله‌تى و هه‌رێمایه‌تى یێن سیاسى و ئابوورى و ئێمناهى و رووارێن دیتر ده‌لیڤێن گرنگ و زێرینن بۆ خورتكرنا په‌یوه‌ندیان دناڤبه‌را وه‌لات و حكومه‌تاندا و دارشتنا پلان و به‌رنامێن تایبه‌ت بۆ چاره‌سه‌ركرنا ئاریشه و قه‌یرانان، سه‌ره‌راى خۆرتكرنا په‌یوه‌ندیێن دبلۆماسى برێكا دیدار و كۆمبوونێن تایبه‌ت دناڤبه‌را سه‌رۆك و سه‌ركردێن پشكدار.
پشكداریا سه‌رۆكێ هه‌رێما كوردستانێ و سه‌رۆك وه‌زیران د ڤان ره‌نگه خڕڤه‌بووناندا ل وه‌لاتێن سه‌ربخۆ و خودان سه‌روه‌رى گرنگتر و پێتڤیتره، خۆشبه‌ختانه لڤان سالێن داویێ هه‌رێما كوردستانێ مینا وه‌لاتێن سه‌ربخۆ پشكداریه‌كا به‌رچاڤ دڤان كۆربه‌ند و كۆنفرانساندا هه‌یه و پێگه‌هێ هه‌رێما كوردستانێ لسه‌ر ئاستێ جیهانى و نیڤده‌وله‌تى بلند و بهێز كریه، ئه‌ڤه ژى ژ ئه‌نجامێ سیاسه‌ت و دبلۆماسیه‌ته‌كا لێزان و حه‌كیمانه و دووربینا هه‌رێما كوردستانێ یه ژلایێ سه‌رۆكێ هه‌رێمێ و سه‌رۆكێ حكومه‌تێ، ئه‌گه‌ر دوور نه‌چین پشكداریا مه‌سرور بارزانى سه‌رۆكێ حكومه‌تا هه‌رێما كوردستانێ ل كۆربه‌ندێ ئابۆرى یێ جیهانى ل داڤۆس ل 15/1/2024 و كۆپیتكا حكومه‌تا ل دووبه‌ى ل 12/2/2024 و نێچیرڤان بارزانى سه‌رۆكێ هه‌رێما كوردستانێ ل كۆنفرانسێ میونشن یێ ئاسایشێ ل 14/2/2024 ده‌ستكه‌فتێن زێده مه‌زنن بۆ هه‌رێما كوردستانێ چۆنكى دڤان كۆربه‌ند و كۆنفرانسێن مه‌زن و نیڤده‌وله‌تى دا سه‌رۆكێ هه‌رێمێ و سه‌رۆكێ حكومه‌تا هه‌رێمێ ره‌وشا هه‌مه‌لایه‌نیا كوردستانێ نه‌خاسمه یا ئێمناهى و سه‌قامگیرى و گه‌فێن لسه‌ر هه‌رێما كوردستانێ و گڤاش و زۆرداریێن نه‌ده‌ستوورى یێن ده‌وله‌تا ئیراقێ و هێرشێن مووشه‌كى و درۆنى گه‌هاندنه جیهانێ و دێ بنه ئه‌گه‌رێن پشته‌ڤانیێ بۆ كوردستانێ، مفا و ده‌ستكه‌فتێن ڤان كۆمبوون و كۆڕبه‌ند و كۆنفراسێن نیڤده‌وله‌تى زۆر د گرنگ و ناهێنه هژماركرن، لێ من دڤێت زێده‌تر ته‌كه‌زیێ لسه‌ر دیدارا مه‌سرور بارزانى سه‌رۆكێ حكومه‌تا هه‌رێما كوردستانێ دگه‌ل كه‌ناڵێ ( ئێن بى سى نیوز ) یێ ئه‌مریكى بكه‌م یا به‌رى هه‌فتیه‌تێ كۆ تێدا جه‌نابێ وى ب راشكاوى و تێر و ته‌سه‌لى گرنگیا سه‌قامگیریا كوردستانێ بۆ ده‌ڤه‌رێ و پێتڤیبوونا هه‌رێمێ ب هاریكاریێن زێده‌تر یێن له‌شكرى و ئابۆرى و سیاسى كر بۆ به‌رهنگاربوونا وان ئاریشه و مه‌ترسیێن تیرۆرێ یێن لسه‌ر هه‌رێما كوردستانێ چ ژلایێ داعشێ یان وان لایه‌نێن هێرشێن دروونى و مۆشه‌كى د ئینه سه‌ر كوردستانێ، سه‌ره‌را پرسێن ئابۆرى و په‌یوه‌ندیێن دگه‌ل ئیراقێ و ئاریشێن ئیراقێ بۆ كوردستانێ درۆستكرى مینا نه‌دانا مۆچه و بوودجه‌ى و رێگریكرنێ ل ئه‌نجامدانا هه‌لبژارتنێن كوردستانێ ژلایێ دادگه‌ها فیدرال و ....هتد , پڕانیا پرسێن دڤێ دیدارێ دا هاتی په‌یامێن گه‌هاندنا دیتنا خه‌لكێ كوردستانێ بوون بۆ ئه‌مریكا و هه‌ڤپه‌یمان و سازیێن نیڤده‌وله‌تى بۆ دابینكرنا ئاسایش و سه‌قامگیریا كوردستانێ و بهێزبوونا قه‌وارێ هه‌رێما كوردستانێ و پشته‌ڤانیا نیڤده‌وله‌تى بۆ خه‌لكێ كوردستانێ و به‌رهنگاریا گرۆپ و تیرۆرستێن دبنه گه‌ڤ لسه‌ر هه‌رێما كوردستانێ.
مخابن هنده‌ك كه‌نالێن راگه‌هاندنێ و سۆشیال میدیایا ئاراسته‌كرى ئه‌ڤ دیدارا مه‌سرور بارزانى به‌رۆڤاژى شرۆڤه‌كر و راشكاویا جه‌نابێ وى به‌رامبه‌ر تیرۆرێ و گرۆپێن چه‌كدارێن مه‌زهه‌ب په‌رست و لایه‌نێ هێرشكارێ سه‌ر هه‌رێما كوردستانێ ب گه‌ف و مه‌ترسى دیاركرن ...! دڤێره‌دا دیار دبیت كۆ ئه‌ڤه میدیایه‌كا ئاراسته‌كرى نه دژى كابینا نه‌هێ یا حكومتا هه‌رێما كوردستانێ، ب تایبه‌ت سه‌رۆكێ حكومه‌تێ و نه‌ڤێت ئه‌مریكا و هێزێن هه‌ڤپه‌یمانا و سازیێن نیڤده‌وله‌تى پشته‌ڤانیا هه‌رێما كوردستانێ بكه‌ن بۆ به‌رپابوونا ئێمناهیێ و سه‌قامگیریێ و بهێزتربوونا هه‌رێما ژلایێ سیاسى و ئابۆرى. چونكى پیلان و پرۆژێن وان لایه‌نێن پشته‌ڤانیا وان دكه‌ن دێ ژناڤ چن و سه‌رناگرن، كۆ ئه‌ڤرۆ سپونسه‌ریا وان دكه‌ن بۆ دژایه‌تیا پارتى و كابینا نه‌هێ، ئه‌و گۆتنێن مه‌سرور بارزانى دڤێ دیدارێدا كرى هه‌مى د به‌رژه‌وه‌ندا هه‌رێما كوردستانێ دانه ژلایێ سیاسى و ئێمناهى و ئابۆرى و له‌شكرى، ئه‌رێ چ مه‌ترسى تێدایه تۆ تیرۆرێ و تیرۆرستا ده‌ستنیشان بكه‌ى و ئاماده‌یا به‌رهنگاریا وان دیار بكه‌ى..؟ ئه‌گه‌ر وه وێره‌كیا وێ چه‌ندێ نه‌بیت به‌ره‌ڤانیێ ل قه‌وارێ هه‌رێمێ و ده‌ستكه‌فتێن خه‌لكێ وێ بكه‌ن و دوژمنا ب دوژمن بده‌نه نیاسین..! هێزێن نشتیمانى و پارێزه‌رێن هه‌ى به‌رژه‌وه‌ندێن خه‌لكێ كوردستانێ لسه‌رڤه‌ى هه‌مى به‌رژه‌وه‌ندا دبینن و د به‌رهه‌ڤن به‌رامبه‌ر هه‌ر هێزه‌كا كارگیركارێن كوردستانێ رابوه‌ستن، یا روون و ئاشكرایه ئه‌ڤرۆ مه‌ترسیێن لسه‌ر هه‌رێما كوردستانێ هه‌ى و پێتڤى یه ڤان مه‌ترسیا و چاوانیا به‌رهنگاربوونێ بۆ جیهانێ و هه‌ڤپه‌یمانا و سازیێن نیڤده‌وله‌تى ئاشكرا بكه‌ین، مه‌سرو بارزانى ژى دڤێ دیدارا دكه‌نالێ ئێم بى سى یێ ئه‌مریكى ب ئه‌ركێ خۆ یێ نشتیمانى رابوو، ئه‌گه‌ر وه وێره‌كیا ڤه‌گێرانا راستیا وێ نه‌بن، به‌رۆڤاژى بۆ خه‌لكێ كوردستانێ ژى ڤه‌نه‌گێڕن، ئه‌وا ڤان كه‌ناڵێن راگه‌هاندنێ و سۆشیال میدیایا كرێگرتى و ئاراسته‌كرى به‌رامبه‌ر گۆتنێن مه‌سرور بارزانى كرى، مه‌زنترین ترسنووكى یه به‌رامبه‌ر دژبه‌رێن كوردستانێ و به‌ره‌ڤانیكرنێ ل قه‌وارێ هه‌رێما كوردستانێ.
ئەم هەواڵە 778جار خوێندراوەتەوە |
