|
ZNA-هەولێر
مەكتەبی سیاسیی پارتی دیموكراتی كوردستان بەبۆنەی(71)ساڵەی دامەزراندنی یەكێتیی قوتابیانی كوردستان پەیامێكی پیرۆزبایی راگەیاند و ئەمەش دەقی پەیامەكەیە ...
بەڕێزان/ سكرتێر و ئەندامانی مەكتەبی سكرتاریەت و هەڤاڵانی لیژنەكانی ڕاپەڕاندنی یەكێتیی قوتابیانی كوردستان..
ئەمڕۆ یادی دامەزراندنی ڕێكخراوێكی كۆڵنەدەر و تێكۆشەر دەكەینەوە، یەكێتیی قوتابیانی كوردستان، ئەو ڕێكخراوە پیشەیی و، پێشەنگەی مایەی شانازیی توێژی قوتابیان و بزووتنەوەی ڕزگاریخوازی گەلەكەمانە.
یەكێتیی قوتابیانی كوردستان، لەسەر بنەمای كوردایەتی و ڕێبازی پیرۆزی (بارزانیی نەمر) بناغەی خۆی داڕشت و بەدرێژایی ئەو كاروانە سەركەشەی توانیویەتی بە پێی پلان و بەرنامەیەكی ڕێكوپێك لە هەموو قۆناغەكاندا ڕۆڵی شیاو و گرنگی خۆی ببینێ.
یەكێتیی قوتابیان، لە ڕێی پەیام و كاروچالاكییەكانییەوە ڕۆژ بە ڕۆژ هەوڵی داوە ئامانجەكانی بەدی بێنێت و دەستكەوتی زیاتر بۆ ئەو توێژە گرنگەی كۆمەڵگەكەمان دەستەبەر بكات و هەر لەو پێناوەشدا بێوچان دەیەها سەركردە و كادیری لێوەشاوە و دڵسۆزی پێگەیاندووە.
دامەزراندنی یەكێتیی قوتابیان لە(18شوباتی1953) وەرچەرخانێكی گرنگ بوو لە كاروانی خەباتی ئازادیخوازی گەلەكەمان و بزووتنەوەی توێژی قوتابیان, لەبەرئەوەی بوو بە یەكەمین سەكۆی ڕێكخراوەیی و بەدیهێنەری خواست و ویست و مافە پیشەییەكانی قوتابیان.
بایەخی توێژی قوتابیان هەمیشە لە بوارەكانی پەرەپێدان و ئاوەدانكردنەوەدا بەرچاو و گرنگ بووە، چونكە ئەوانن هەڵگری چرای زانست و فێربوون و ڕۆشنبیری و پێشكەوتن لە وڵاتەكەماندا، هەروەها جێی متمانەن بۆ پتەوكردن و قووڵكردنەوەی هۆشیاریی نەتەوەیی و نیشتیمانپەروەری لە نێوان ئەو توێژە خوێنگەرمەدا.
لەو هەلومەرجەی ئەمڕۆشماندا خوازیارین هەمان رۆڵی شیاوی خۆتان ببینن وەك ئەركی توێژێكی بونیادنەری وڵات و شانبەشنی چین و توێژەكانی دیكە بۆ بەرەوپشێبردنی كۆمەڵگەكەمان لەسەر بنەمایەكی ڕاست و دروستی هاوچەرخانە و داكۆكیكردن لە دەستكەوتەكانمان و قەوارە سیاسییەكەمان.
لە بیرەوەری(18ی شوبات) ساڵیادی دامەزراندی یەكێتیی قوتابیانی كوردستان و ڕۆژی قوتابیانی كوردستان دا، وێڕای پیرۆزباییمان لە ئێوە و كادیر و ئەندامانی ڕێكخراوەكەتان، گەرمترین پیرۆزبایی ئاراستەی سەرجەم قوتابیانی خۆشەویستی كوردستان دەكەین. جارێكی دیكە پشتیوانی خۆمان بۆ یەكێتیی قوتابیان دووپات دەكەینەوە و، هیوادارین وەك هەمیشە و بەردەوام لە ئاست ئەو ئەركە پیرۆزەتان بن و مایەی متمانەی توێژی قوتابیان و پێشەنگی بزووتنەوەی ڕێكخراوەیی قوتابیان بن بۆ بەرجەستەكردن و بەدیهێنانی مافەكانیان و خزمەتگەیاندن بە ڕەوتی زانست و كایە ڕۆشنبیرییەكان.
سڵاو لە گیانی پاكی ئەو شەهیدە نەمرانەی لە ڕێگای سەروەری و سەرفرازی یەكێتییەكەتان و مافە ڕەواكانی گەلەكەمان قوربانیاندا و گیانیان بەخشی.
سڵاو لە(71) ساڵ خەباتی نەپساوە و بەردەوامی یەكێتیی قوتابیانی كوردستان.
مەكتەبی سیاسیی پارتی دیموكراتی كوردستان
17 ی شوباتی 2024
ئەم هەواڵە 496جار خوێندراوەتەوە |
