2024-01-27 [03:50 AM]

لێژنەی دارایی پەرلەمانی عێراق ئاشكرای كرد، بانکی ناوەندیی عێراق کۆتایی بە کارکردن بە سیستمی ئەلیکترۆنی حەواڵەکردنی دۆلار بۆ دەرەوە دەھێنێت.

بانکی ناوەندیی عێراق، نووسراوێکی ئاراستەی بانکەکانی عێراق کردووە و جەختی کردووەتەوە، تاوەكو کۆتایی ئەمساڵ کۆتایی بە کارکردن بە سەکۆی ئەلیکترۆنی حەواڵەکردنی دۆلار بۆ دەرەوە دەهێنێت.

د.خەلیل غازی، ئەندامی لیژنەی دارایی پەرلەمانی عێراق، رایگەیاند: "بانكی ناوەندیی عێراق لە كۆتایی ئەمساڵدا كۆتایی بە سیستەمی ئەلیكترۆنی حەواڵەكردنی دۆلار بۆ دەرەوە دەهێنێت و زیاتر چاودێریی حەواڵەكردنەكە دەكرێت."

ئاماژەی بەوەش دا: "بڕیارەكەی بانكی ناوەندی بۆ ئەوەیە سیستەمی بانكی پێشبخرێت و هانی بانكەكان بدرێت بۆ دروستكردنی پەیوەندی دارایی و بانكی لەگەڵ بانكە جیهانییەكان، بانكەكان دەبێت بەڵگەكانی خۆیان رادەستی بانكی ناوەندی بكەن، چونكە لە ساڵی داهاتوودا بە سیستەمی تازە حەواڵەكردن دەكرێت."

خەلیل غازی، جەخت دەكاتەوە: " ئەم هەنگاوە بەمەبەستی بەرزكردنەوەی بەهای دینارە لە بەرامبەر دۆلار و بۆ ئەوەیە دۆلار كەمتر مامەڵەی پێوە بكرێت."

ئەندامەكەی لیژنەی دارایی ڕوونی کردەوە، کاری سەکۆ ئەلیکترۆنییەکە لە ساڵانی داھاتوو تەنیا دەبێتە چاودێریی و وردبینیکردنی حەواڵە و پێویستە بانکەکان راستەوخۆ پەیوەندی لەگەڵ بانکەکانی دەرەوەی وڵات دروست بکەن.

بەگشتی هەفتانە بانكی ناوەندیی عێراق ملیارێك دۆلار لەرێگەی سەكۆی ئەلیكترۆنی دەخاتە ڕوو، كە نزیكی 85%ی حەواڵەی دەرەوەیە.

شوان به‌رزنجی