2023-12-26 [07:07 AM]

لوید ئۆستن، وەزیری بەرگری ئەمریکا رایگەیاند :'' هێرشەکانمان بۆسەر بنکەکانی حیزبوڵڵا لە عێراق، وەڵامێک بوو لە بەرامبەر ئەو هێرشانەی کرانە سەر بنکەکانمان.‎

هاوکات ئەدریان واتسن، گوتەبێژی ئەنجومەنی ئاساییشی نیشتمانیی سەر بە کۆشکی سپی رایگەیاندووە، "لە پەیوەندییەکی تەلەفۆنیشدا سەرۆک بایدن لەگەڵ وەزیری بەرگریی ئەمریکا، لوید ئۆستن و هەروەها تیمی ئاسیشی نیشتمانی، فەرمانی بە هێرشکردن کردووە بۆسەر سێ شوێنی دیاریکراو کە لەلایەن کەتایبی حیزبوڵڵا و هەروەها گرووپەکانی سەر بە کەتایبی حیزبوڵڵا بەکارهێندراون و ژمارەیەک بنکەو بارەگایان بۆردوومان کرد.''

هاوکات فەرماندەیی ناوەندیی هێزەکانی ئەمریکا - سێنتکۆم  رایگەیاند، بەرەبەیانی ئەمڕۆ گرووپە چەکدارەکانی نزیک لە ئێران، لە هەولێر هێرشیان کردووەتە سەر هێزەکانی هاوپەیمانان و چەندین برینداری لێکەوتووەتەوە.

راشیگەیاندووە، بۆردوومانەکە وەکو وەڵامێک بووە بۆ هێرشی ئەو گرووپە چەکدارانە کە بە سپۆنسەری ئێران، پێشووتر کردبوویانە سەر هێزەکانی هاوپەیمانان و ئەمریکا لە عێراق و سوریا.