|
هەولێر – ZNA حه‌مه‌ی حه‌مه‌سه‌عید، وه‌زیری رۆشنبیری و لاوانی حكومه‌تی هه‌رێمی كوردستان ئه‌مڕۆ له ده‌ربه‌ندیخان حه‌وته‌م فێستیڤاڵی شانۆی شه‌قامی كرده‌وه و له وتارێكدا رایگه‌یاند، یه‌كێك له ئه‌ركه سه‌ره‌كییه‌كانی وه‌زاره‌تی رۆشنبیری و لاوان خزمه‌تكردنی شانۆ و زه‌مینه‌سازییه بۆ شانۆكارانی كورد.
ئه‌مڕۆ له ده‌ربه‌ندیخان به به‌شداری ده‌یان گرووپی شانۆیی ناوخۆیی و ده‌ره‌كی، حه‌وته‌م فێستیڤاڵی نێوده‌وڵه‌تی شانۆی شه‌قام له ده‌ربه‌ندیخان ده‌ستی پێكرد و بڕیاره فێستیڤاڵه‌كه پێنج رۆژ بخایه‌نێت.
به مه‌به‌ستی ئاماده‌بوون له رێوڕه‌سمی ده‌ستپێكردنی فێستیڤاڵه‌كه‌دا، وه‌زیری رۆشنبیری و لاوان سه‌ردانی ده‌ربه‌ندیخانی كرد و له لایه‌ن سلێمان محه‌ممه‌د سه‌عید، قائیمقامی قه‌زای ده‌ربه‌ندیخان و به‌رپرسانی ئیداری شاره‌كه‌وه پێشوازی لێكرا.
له هۆڵی رۆشنبیری ده‌ربه‌ندیخان، له رێوڕه‌سمی كردنه‌وه‌ی فێستیڤاڵه‌كه‌دا، حه‌مه‌ی حه‌مه‌سه‌عید، وه‌زیری رۆشنبیری و لاوانی حكومه‌تی هه‌رێمی كوردستان وتارێكی پێشكه‌شكرد.
له وتاره‌كه‌دا وه‌زیری رۆشنبیری و لاوان رایگه‌یاند، "هونەری شانۆ یەکێکە لە هونەرە جوانەکان، هاوتەمەنی کۆمەڵایەتیبوونی ژیانی مرۆڤە، یەکێکە لە هەرە ھۆکارە گرنگەکانی فێربوون و وێناکردنی جوانی ژیان".
گوتیشی: "لە رێگەی ئەم هونەرەوە : (دیاردە و کەسێیتیەکان وڕرووداوەکان) لە ناو مێژووەوە دەهێنرێنەوە ناو ژیان و بەشێوەیەکی بەرجەستە پیشاندەدرێنەوە، لێرەشەوە گرنگی و بایەخی ھونەری شانۆ وەک هونەرێکی جوان دەنرخێنرێت".
سه‌باره‌ت به مێژووی شانۆی كوردی، وه‌زیری رۆشنبیری و لاوان وتی: "ئەگەرچی تەمەنی هونەری شانۆ وەک هونەری جوان لە ناو ئێمەی کورددا زۆر نییە، بەڵام شانۆکارانی کورد بە دڵسۆزی و خۆنەویستی، نەخشی گەورەیان هەبووە و بەرهەمی جوان و بەپێزیان نمایش و پێشکەش کردووە".
روونیشیكرده‌وه، "ھونەرمەندانی کورد لە فێستیڤاڵ و دیدارە شانۆییەکاندا لە ناوەوە و دەرەوەی کوردستانیش كاره‌كته‌رێكی دیاربوون و توانیویانە خەڵاتی گرنگ بەدەست بھێنن".
له باره‌ی ئه‌ركی وه‌زاره‌تی رۆشنبیری و پشتیوانیكردنی شانۆكارانی كورد، وه‌زیری رۆشنبیری و لاوان وتی: "وەک وەزارەتی رۆشنبیری و لاوان یەکێک لە ئەرکە سەرەکییەکانمان خزمەتی شانۆ و زەمینەسازییە بۆ شانۆکاران، هەتا بتوانن خەرمانی توانا و داهێنانی خۆیان لە بواری ئەم هونەرەدا گەورەتر و فراوانتر و جوانتربکەن".
به هۆی قه‌یرانی دارایی و په‌تای كۆرۆناوه له 2019ه‌وه فێستیڤاڵی نێوده‌وڵه‌تی شانۆی شه‌قام له ده‌ربه‌ندیخان به‌ڕێوه‌نه‌چووه، ئه‌مساڵ به هه‌وڵی وه‌زاره‌تی رۆشنبیری و لاوان جارێكی دیكه فێستیڤاڵه‌كه خراوه‌ته‌وه‌گه‌ڕ.
له‌و باره‌یه‌وه حه‌مه‌ی حه‌مه‌سه‌عید گوتی: "ئەگەرچی ساڵانێکە قەیرانی دارایی و رووداو پێشھاتە نەخوازراوەکان لەسەر سینگی هەمووان چۆکیان داداوە، بەڵام چراخانی نماییشە شانۆییەکان لەشارو شارۆچکەکانی کوردستاندا هەر رۆشن و گەشاوە بوون".
جه‌ختیشیكرده‌وه، "وەزارەتی رۆشنبیری لەکابینەی نۆھەمی حکومەتی ھەرێمی کوردستاندا و لە رێنماییەکدا فێستیڤاڵە نێودەوڵەتیەکانی رێکخستەوە، لەو رێنماییەدا فستیڤاڵی شانۆی سەرشەقام بۆ شاری دەربەندیخان دیاریکراوە".
ئاماژه‌ی به‌وه‌شدا، "ئەمساڵ وەزارەت پشتیوانی سێ فێستیڤاڵی شانۆی سەرشەقامی کردووە، ئەوانیش یەکەم لە چەمچەماڵ و دووەم لە کەرکووک و سێیه‌میان له ده‌ربه‌ندیخانه".
له كۆتایی وتاره‌كه‌یدا، حه‌مه‌ی حه‌مه‌سه‌عید، وه‌زیری رۆشنبیری و لاوان "دەستخۆشی لەبەڕێوەبەرایەتی رۆشنبیری دەربەندیخان كرد و سوپاسی ھەوڵ و ماندووبونی رێكخەرانی فێستیڤاڵەکە و ئیدارەی شارەکەی كرد".
هه‌ر له چوارچێوه‌ی سه‌ردانه‌كه‌یدا بۆ ده‌ربه‌ندیخان، وه‌زیری رۆشنبیری و لاوان سه‌ردانی به‌ڕێوبه‌رایه‌تی به‌نداوی ده‌ربه‌ندیخانی كرد و له لایه‌ن به‌ڕێوبه‌ر و فه‌رمانبه‌رانی به‌ڕێوبه‌رایه‌تییه‌كه‌وه پێشوازی لێكرا و پاشانیش ئاماده‌ی به‌شێك له چالاكییه‌كانی فێستیڤاڵه‌كه بوو.
ئەم هەواڵە 361جار خوێندراوەتەوە |
