|
هەولێر – ZNA یه‌كه‌م دیداری ئه‌ده‌بی ئاكرێ به ئاماده‌بوونی ژماره‌یه‌كی به‌رچاو له به‌رپرسانی ئیداری و رۆشنبیران و هونه‌رمه‌ندانی سنووره‌كه له ئاكرێ به‌ڕێوه‌چوو.
ئاریان سه‌لاحه‌دین، بریكاری وه‌زاره‌تی رۆشنبیری و لاوانی حكومه‌تی هه‌رێمی كوردستان ئاماده‌بوو و له وتارێكدا پشتیوانی وه‌زاره‌تی بۆ چالاكییه رۆشنبیری و هونه‌ری و ئه‌ده‌بییه‌كانی ئاكرێ دووپاتكرده‌وه.
ئاماژەی بۆ ئەوەشکرد، وه‌زاره‌تی رۆشنبیری و لاوان به ئه‌ركی خۆی ده‌زانێت پشتیوان و سه‌رخه‌ری چالاكییه رۆشنبیری و هونه‌رییه‌كانتان بێت.
دیداره‌كه له لایه‌ن به‌ڕێوبه‌رایه‌تی رۆشنبیری و هونه‌ری ئاكرێ، به هه‌ماهه‌نگی له‌گه‌ڵ بزاڤی رۆشنبیری ئاكرێ، رێكخرابوو.
له وتاری وه‌زاره‌تی رۆشنبیری و لاواندا، ئاریان سه‌لاحه‌دین، بریكاری وه‌زاره‌ت باسی له گرنگی رۆڵ و به‌شداری كارای ئه‌دیب و رۆشنبیر و هونه‌رمه‌ندانی ئاكرێ له پێشخستنی بزاڤی رۆشنبیری كوردیی كرد.
له‌و باره‌یه‌وه ڕایگه‌یاند، نووسه‌ران و رۆشنبیرانی ئاكرێ له كاروانی پێشخستنی رۆشنبیری و هونه‌ری كوردستان به گشتیی و ناوچه‌كه به تایبه‌تیی هه‌نگاوی گه‌وره‌یان ناوه و به‌شێكی به‌رچاوی رۆشنبیرانی ناوچه‌كه جگه له زمانی كوردی، به زمانی عه‌ره‌بیش قه‌ڵه‌مه‌كانیان خستووه‌ته خزمه‌تی دۆزی ره‌وای نه‌ته‌وه و نیشتمانه‌كه‌یان و بوونه‌ته پردی په‌یوه‌ندی فه‌رهه‌نگی و كولتووری و رۆشنبیری نێوان پێكهاته جیاجیاكانی عێراق.
گوتیشی: وه‌زاره‌تی رۆشنبیری و لاوان بۆ هه‌ر جۆره چالاكییه‌كی هونه‌ری، ئه‌ده‌بی و رۆشنبیری له سنووره‌كه پشتیوان و هاوكار ده‌بێت، به‌و پێیه‌ی وه‌زاره‌تی رۆشنبیری و لاوان به ئه‌ركی خۆی ده‌زانێت، خزمه‌تی زیاتری به‌ره‌وپێشبردنی بزاڤی رۆشنبیری و هونه‌ری نه‌ته‌وه‌یی و نیشتمانیی بكات.
یه‌كه‌م دیداری ئه‌ده‌بی ئاكرێ، سێ پانێڵی له خۆگرتبوو، دواتر له رێوڕەسمێکدا خه‌ڵاتی رێزلێنانی دیداره‌كه به‌خشرایه بنه‌ماڵه‌ی شاكر فه‌تاح، وه‌ك رێزگرتنێك له خه‌بات و خزمه‌ته‌كانی، به بواری رۆشنبیری كوردستان به گشتیی و ئاكرێ به تایبه‌تی.
ئەم هەواڵە 433جار خوێندراوەتەوە |
