2023-12-13 [10:43 AM]

نووسینگەی ڕاگەیاندنی سەرۆکوەزیرانی عێراق لە ڕاگەیاندراوێکدا ئاماژەی بەوەداوە کە محەمەد شیاع سوودانی و وەزیری دەرەوەی ئەمریکا، ئەنتۆنی بلینکن لە پەیوەندییەکی تەلەفۆنییدا، پتەوترکردنی پەیوەندییەکانی نێوان بەغدا و واشنتۆن، ھەروەھا پێشھاتەکانی سەر ئاستی ھەرێمی و نێودەوڵەتییان تاوتوێ کردووە.

بەپێی زانیارییەکان، شەوی ڕابردوو ئەنتۆنی بلینکن لەبارەی ھێرشەکانی ئەم دواییانە بۆسەر باڵیۆزخانەی ئەمریکا و ھێزەکانی ھاوپەیمانی نێودەوڵەتی لە عێراق، پەیوەندییەکی تەلەفۆنی لەگەڵ محەمەد شیاع سوودانی ئەنجامداوە.

بەپێی ڕاگەیاندراوەکە لە میانی پەیوەندییە تەلەفۆنییەکەدا، سەرۆکوەزیرانی عێراق جەختی کردووەتەوە لە پەرۆشی عێراق بۆ بنیاتنانی پەیوەندی ھاوبەشی و ھاریکاری لەگەڵ وڵاتانی دۆست، ھەروەھا پێکەوەکارکردن بۆ ڕووبەڕووبوونەوەی ئاستەنگەکانی ئابووری، ئەمنی و ئاووھەوا، بە شێوەیەک کە پاڵپشتی لە ھەوڵەکان بکات بۆ پتەوترکردنی سەقامگیری لە ناوچەکەدا.

باسی لەوەیش کردووە کە لە پەیوەندییە تەلەفۆنییەکەدا، محەمەد شیاع سوودانی ڕایگەیاندووە کە پابەندن بە پاراستینی گیانی نێردە دیپلۆماسییەکان و ڕاوێژکارانی سەربازی بیانی لە عێراق و گوتوویەتی: "ھێزە ئەمنییەکانی عێراق بەدواداچوون بۆ ئەنجامدەرانی ھێرشەکانی سەر نێردە دیپلۆماسییەکان لە عێراق دەکەن، بەبێ ئەوەی ھیچ لایەنێکی دەرەکی دەستوەران لەوبارەیەوە بکات.

ئەوەیشی خستووەتەڕوو کە لای خۆیەوە وەزیری دەرەوەی ئەمریکا، ئەنتۆنی بلینکن لە پەیوەندییە تەلەفۆنییەکەدا، ئاماژەی بە بەردەوامی پێکەوەکارکردن لەنێوان وڵاتەکەی و عێراق کردووە، ھەروەھا خۆشحاڵی خۆی نیشانداوە لەبارەی گرتنەبەری ڕێوشوینەکانی حکوومەتی عێراق بۆ پاراستنی نێردە دیپلۆماسییەکان و باڵیۆزخانەکان لە عێراق و بەدواداچوون بۆ ئەو لایەنانەی کە تێوەگلاون لە ئەنجامدانی ھێرشەکانی سەر نێردە دیپلۆماسییەکان و باڵیۆزخانەکان لە عێراق.

AA