2023-11-13 [02:01 AM]

چەكی مووچەی مانگی نۆی مامۆستایانی وانەبێژ دەكرێت و بەرپرسێكی دارایی و نوێنەرێكی وانەبێژانیش وردەكارییەكەی دەخەنە ڕوو.

سیامەند ئیسماعیل، بەڕێوەبەری گەنجینەی ئیدارەی سۆران، ڕایگەیاند: "دوێنێ ئێمە چەكی مووچەی مانگی نۆی وانەبێژانمان بە پەروەردەكان داوە بۆ خەرجكردنی، ئەوانیش بردووبانە بۆ بانك و هەر كات سیوولە بەردەست بێت، ئەوە مووچەكانیان بۆ خەرج دەكرێت."

ئاماژەی بەوەش دا: "مامۆستای وانەبێژ لە هەموو پەروەردەكانی سنووری ئیدارەكەمان هەن و هەموو ئاسانكارییەك كراوە بۆ ئەوەی شایستەی وانەبێژان بدرێت."

ژمارەی مامۆستایانی وانەبێژ لە هەرێمی کوردستان 36 هەزار کەسە و مووچەی مانگانەیان زیاترە لە 13 ملیار و 700 ملیۆن دینار.

لای خۆیەوە، کارۆخ عەبدوڵا، نوێنەری گشتیی مامۆستایانی وانەبێژ،  ڕایگەیاند: "دوێنێ 12ی11، ژمێریاری پەروەردەكان بەگشتی و سنووری سلێمانی بەتایبەت، ئاگادار كرانەوە شایستەی دارایی مانگی نۆی مووچەی وانەبێژان بكرێتە چەك."

بەپێی ڕێنمایی ژمارە 14ی دارایی، ئەو مامۆستا وانەبێژانەی هەڵگری بڕوانامەی دبلۆمن، 350 هەزار دیناریان بۆ خەرج دەکرێت و بۆ هەڵگرانی بڕوانامەی بەکالۆریۆسیش 400 هەزار دینار خەرج دەکرێت.

نوێنەری گشتیی مامۆستایانی وانەبێژ جەخت دەکاتەوە: ئومێد هەیە مووچەی مانگی نۆی مامۆستایانی وانەبێژ زوو دابەش بكرێت."

کارۆخ عەبدوڵا باسی لەوەش كرد: "بۆ ئەوەی كێشەی بایكۆتی مامۆستایانی وانەبێژ لە سلێمانی چارەسەر بكرێت، هەوڵێك هەیە كۆبوونەوە لەگەڵ نوێنەری مامۆستایان بكرێت."

شوان به‌رزنجی