2023-10-09 [10:06 AM]

ئەمڕۆ دووشەممە، دادگای تاوانەکانی بەسرە کە تایبەتە بە دۆسیەکانی دەستپاکی، دوو سزای 15 ساڵ زیندانی بەسەر ئەو کەسانەدا سەپاند، کە گەندەڵییان لە خانەنشینانی بەڕێوەبەرایەتی پۆلیسی پارێزگای بەسرە کردووە بۆ ساڵانی 2014 و 2015.
دەسەڵاتی دادوەری لە بەیاننامەیەکدا رایگەیاند، " لەبڕیاری یەکەمدا سزا بۆ سێ تۆمەتبار دەرچوو، کە یەکێکیان بەڕێوەبەری پێشووی ژمێریاری فەرماندەیی پۆلیسی بەسرە بووە، کە سزای 15 ساڵ زیندانیکردنیان بەسەردا سەپێندرا، ئەمەش دوای ئەوەی گەندەڵییان کردووە، لە خانەنشینی بەڕێوەبەرایەتی پۆلیسی پارێزگای بەسرە بۆ مانگەکانی (شوبات، ئایار، تەمموز، ئەیلوول، و تشرینی یەکەم) بۆ ساڵی 2015.
ئاماژەی بەوەشکردووە، لە بڕیاری دووەمیشدا دووبارە سزای 15 ساڵ زیندانی بەسەر بەڕێوەبەرەکەی پێشووی ژمێریاری فەرماندەیی پۆلیسی بەسرە دا سەپێنرا. کە لە ساڵی 2015 گەندەڵی کردووە.
ناوبراو لە درێژەی قسەکانیدا گوتی: بڕیارەکان بەپێی بڕگەکانی مادەی 315ـی یاسای سزادانی ژمارە 111ـی ساڵی 1969 کە هەموار کراوە و بەپێی مادەکانی 47 و 48 و 49ـی دا هاتوون.