2023-10-09 [09:50 AM]

لە دوای سەرهەڵدانى جەنگی نێوان حەماس و ئیسرائیل نرخی نەوت بەرزبونەوەی بەرچاوی تۆمارکرد و زیاتر لە 88 دۆلار بۆ یەک بەرمیل مامەڵەی پێوە کراوە.

ئاژانسە ئابوریەکان بڵاویان کردەوە، ئەمڕۆ دوای کردنەوەی بازارەکانی ئاسیا، نرخی نەوت زیاتر لە 4 دۆلاری بەرزبوەوە بە جۆرێک بەرمیلێک نەوتی برێنت چوار دۆلار و 18 سەنت بەرزبوەوە و بە 88 دۆلار و 76 سەنت مامەڵەی پێوەکرا، هاوکات نەوتی خاوی ئەمریکاش بڕی چوار دۆلار و 23 سەنت نرخەکەی بەرزبوەوە و بە 87 دۆلار و دوو سەنت مامەڵەی پێوەکرا.

بەرزبونەوەی خێرای نرخی نەوت بۆ ناسەقامگیریی رۆژەهەڵاتی ناوەڕاست وهێرشەکانی حەماس بۆ سەر ئیسرائیل دەگەرێتەوە کە بە گەورەرترین هێرشی سەربازی لە چەندین دەیەی رابردو هەژماردەکرێت و گەورەترین شەڕی نێوان ئیسرائیل و فەڵەستینە.

شرۆڤەکارانی ئابوری جیهانیش، باس لەوەدەکەن ئاڵۆزیەکان لە ئاسیا دەبێتە هۆی کەم بونەوەی نەوت لەبازارەکانداو ئەمەش زیاتر نرخەکەی بەرزدەکاتەوە و شرۆڤەکارێکى بانکى کۆمۆنێلسى ئوسترالیاش لە یاداشتێکدا ئاشکرایدەکات کە ئەم ناکۆکییانە دەبێت ببێتە هۆى کەمبونەوەى بەردەوامى دابینکردنى نەوت بۆ ئەوەى ئەو ململانێیانە کاریگەریی لەسەر نرخەکەى دروست نەکان.