2023-09-24 [02:48 AM]

دوای سێ رۆژ لە چالاكی و نمایشە هونەرییەكان، دوێنێ پێنجەم فێستیڤاڵی شانۆی قەزاکان لە چەمچەماڵ کۆتاییهات و خەڵاتی فێستیڤاڵ بەسەر سەرکەوتوواندا دابەشکرا.

لە رێوڕەسمی کۆتاییدا، کە بە ئامادەبوونی د. موحسین ئەدیب، بەڕێوەبەری گشتیی ڕۆشنبیریی و هونەری سلێمانی و رەمک رەمەزان، قائیمقامی چەمچەماڵ و د. هەڵەت رەشید، سەرۆکی زانکۆی چەرموو و ژمارەیەکی بەرچاو لە هونەرمەندان و رۆشنبیران و میوانان بەڕێوەچوو، وتاری کۆتایی فێستیڤاڵ لە لایەن بەختیار شەریف قوربانی، بەڕێوەبەری رۆشنبیریی و هونەری چەمچەماڵ پێشکەشکرا، دواتریش وتاری سوپاسگوزاری لەلایەن قائیمقامی چەمچەماڵەوە خوێنرایەوە.

پاشان، چەندین چالاکی هونەری پێشکەشکران، لەگەڵ پێدانی خەڵاتی رێزلێنان بەو لایەن و کەسایەتییانەی هاوکاری سەرخستنی فێستیڤاڵەکە بوون، هەروەها ناوی براوەی خەڵاتەکانی فێستیڤاڵ راگەیەندرا.

پێنجەمین فێستیڤاڵی شانۆی قەزاکان لەچەمچەماڵ بەدرووشمی "بەرەو ئارامی تاک" بە چاودێری و ئامادەبوونی حەمەی حەمەسەعید، وەزیری رۆشنبیری و لاوانی حكومەتی هەرێمی كوردستان و بە بەشداری چەندین گرووپی شانۆیی هەرێمی کوردستان و رۆژهەڵاتی کوردستان لە رۆژانی 21 – 23ـی ئەیلوولی 2023 بەڕێوەچوو.