2023-05-20 [11:19 AM]

موزەخانا یادگەھا نیشتمانی یا بارزانی  ل بارزان  دناڤ مەزارێ نەمران  دا ھاتە ڤەکرن ، ئەڤە چەند سالە کار ل سەر دھێتە کرن ، ئەڤ موزەخانەیە باسێ پشکەکا دیرۆکی یا خەلکێ مە دکەت وان قەھرەمانان ئەڤێن گیانێ خو فیدایێ کورد و کۆردستانێ کری ژ پێخەمەت ئەڤرو کو ئەم بوینە خودان دەست کەفت و سەربەخو و ئازاد دژین ، کا ل کیرێ دەست پێکریە و ئەڤرو گەھشتینە کێرێ و چ ئاست و ب چ گەھشتینە ، ئەڤ شورەش و بەرخودان و قوربانی دانە ھەمی ب شەڤەك و روژەکا چێ نەبوویە و وەسا ب ساناھی ژی ب دەست مللەتێ کورد ڤە نەھاتنە ، بێ قوربانی دان ژی نەبوویە ، بێ ئێش و ئازار ژی نەبوویە ، بێ خوین رێتن ژی نەبوویە ، بێ برین و دەربازکرنا رێکێن سەخت و دژوار و پری ئاستەنگ ژی نەبوویە  ... گەلەکێن دی ..
بەلکو ھەر بھوستەکا ئاخا پیروزا کۆردستانێ  ب خوینا پێشمەرگەھەکێ ، قەھرەمانەکێ ، مێرخازەکێ ، کۆرد پەروەرەکێ  و چاڤ نەترسەکێ وەلاتێ مە یا ئاڤا بووی .

ئەڤ موزەخانا یادگەھا نیشتمانی یا  بارزانی  ب رەنگەکێ وەسا پێشکەفتی و سەردەمیانە یا ھاتیە دروست کرن ، دەمێ مروڤ دچیتە دناڤا ڤێ موزەخانا دیرۆکی دا وەسا ھزر دکەت کو ئەمێن ناڤ وی دەمی دا یێ کو (بارزانی نەمر)ـی دگەل  ھەڤالێن خو شورەش تێدا دکر ، مروڤ دچیتە دناڤا کیراتیا دیروکێ دا و ھەست ب زحمەت و ئازارێن وی دەمی دکەت ، ھەست ب ھندێ دکەت کو چەندا ب ترس بویە داوا ئازادیێ ل خوین مێژێن وی دەمی بکەی ..

شێوێ موزەخانێ ل سەر پێکڤە ژیانێ یا چێکری ، بارزان  ھەر دکەڤن دا جھێ پێکڤە ژیانا ھەمی ئول و مەزھەب و نەتەوا بوویە بێ جوداھی دبن سێبەرا ئێك ئالا و سەرکردە دا دژیان ، (مزگەفتا موسلمانا دناڤبەرا کەنیشتا جووھیان و کەنیسا مەسیحیان) دا بوو ..

موزەخانا یادگەھا نیشتمانی یا بارزانی  باس ل دیروکا مللەتێ کورد دکەت ھەر ل سەردەمێ (شێخ عبدالسەلام بارزانی و شێخ احمدێ بارزانی "خودانێ بارزان" و مەلا مستەفا بارزانی  "بارزانی نەمر")  .

گوندێ بارزان  زێدەیر ژ (١٦) جاران یێ ھاتیە وێرانکرن و توپباران کرن و دگەل  عەردی یێ تەخت کری دوژمنێن کوردان .
دڤێ موزەخانا  ب بھادا چەندەھا دیمەنێن دیرۆکی یێن تێدا :
ئێك ژوان ب نەخشە و ناڤێن جھاڤە ب رەنگەکێ عەمەلی و تەکنەلۆژیایی باسێ ھندێ دکەت کو ل کومارا مھابادێ "بارزانی نەمر" و ھەڤالێن دگەل دا بریار دای بچنە ئێکەتیا سوڤیەتێ ل روسیا .
مەلا مستەفا بارزانی  دگەل (٥٠٣) ھەڤالێن خو ل مھابادێ رۆژھەلاتا کۆردستانێ  رێکەفتن ب پێیا بەرەف ئێکەتیا سوڤیەتێ و سنورێ چەند دەولەتان ب پێیان بری کۆ (٧٤٨) کیلومەتر د ماوێ (٦٤) رۆژان دا  ، دەربازبوون ل رووبارێ (ئاراس) و د رێکێ دا رووبەروویێ چەند ھێرشان بوون ب ترس و برس خارنا وان بتنێ ئەو بو یادگەل خو بری د جەنتێن وان دا ھەتا  گەھشتینە جھێ مەبەست .

د بەشەکێ دی دا جل و بەرگ و چەك و ھەمی کەل و پەلێن  بارزانی نەمر  یێن تێدا  کۆ ھەر ئێك ژووان ژی دیروک و سەربورێن تایبەت ھەنە د درێژاھیا خەبات و تێکوشان و شورەشان دا یێت بکار ئینای ،  ھەتا ل سەر جل و بەرگێن بارزانی نەمر  جھێن ساچمێن دوژمنا دیارن .
گەلەك دیمەنێن دی کو ئەز نەشێم ھەمیا د گوتارەکێ دا باس بکەم .

یادگەھا  نیشتمانی یا بارزانی  دڤێت ببیتە سەنتەرەکێ زانیاری و قەکۆلینان ھەتا کۆ نڤشێ نوویێ داھاتی ژی وان ئازار و نەھامەتی و نەخوشیێن بەرێ ژبیر نەکەن و بزانن کا چاوا گەھشتنە ڤێ روژێ ..

لەوما ئەز داخازێ ل ھەمی گەنجان دکەم جیلێ نووی سەردانا موزەخانا یادگەھا نیشتمانی یا بارزانی  بکەن ل مەزارێ نەمران ل بارزان ، دا کو پتر ژ دیروکا کۆردان بزانن دیروکا کۆردستانێ  ب رەنگەکێ باش و تاقیکاری ب چاڤێ خو ڤان دیمەنان ببینن ھەست ب ھەستا نیشتمان و کورد پەروەریێ بکەن ، چونکێ دڤێت ئەم دیروکا  وەلاتێ خو ب باشی بزانین ھەردەم ل پێش چاڤێت مە بیت .

ھەر کەسەکێ دیروکا وەلاتێ  خوە ب باشی نەزانیت و زانیاری ل سەر ئاڤا بوونا وەلاتێ خوە نەبیت ، قەدر و قیمەتا ئەڤ ئازادیا تێدا نەزانیت چ فەرقا وی دگەل  کەسەکێ بیانی نینە .

ئەڤ یادگەھە راسپارد نامەیەکە ئاماژە ب مانەڤا گەلێ کۆرد دکەت و نامەیەکا بەردەوامیێ یە ل سەر پێکڤە ژیان و ئاشتیێ نیشان ددەت .
ئەڤ کەسێن سەردانا ڤێ موزەخانێ دکەن  سەردانکەر و نڤیسەر دشێن ل رێژەیەکا زورا ژێدەران ل کتێبخانێ و موزەخانێ سود مەند بن ، دگەل  ھەبوونا کتێبخانەکا ئەلیکترونی کۆ ل ھەر جھەکێ ئەڤێ جیھانێ دێ یا بەردەست بیت .

ھەر  ل ڤێرە دا جھێ تایبەت یێ ھاتیە دابین کرن بۆ سمینار و کونفرانس ، پیشانگەھان ، سەردانکەرێن یادگەھا نیشتمانی دشێن گەشتەکێ دناڤا دیروکێ دا بکەن دھەمان دەم ژی دا دشێن خوشیێ ببینن ل جوانی و دیزاینا مودێرن و سەردەمیانەیا   یادگەھێ  کۆ ئاماژێ دکەت ب سەرکەفتن و بەرخودانا سەدەھا سالێن گەلێ کورد .