2022-06-24 [07:51 AM]

رووداو و پێشهاتەكانی ناوچەكە و جیهانی  ئاماژەیەكی روون و ئاشكران بەوەی كە لە ئێستادا زیاتر  لە هەموو كات پێویستمان بەئیرادەیەكیی بەهێز و هێزێكی نەرم و دیپلۆماسییەتێكی كارا هەیە بۆ نێوەندگیریی و خاوكردنەوەی گرژییەكان ، ئەم ئیرادەیەش پێویستی بە كەسانێكە بەو جووڵە  دییلۆماسی و سیاسییانە هەڵبستن و بە  بڕیاری ژیرانە  و دروست بە ئاڕاستەی پاراستنە  بەرژەوەندییە باڵاكانی كورد و  كوردستان بدەن، دەستكەوتەكان و قەوارەكەكان پارێزراو و نێوماڵی كوردیش تەبا بێت .بۆیە، ئەوە كەسایەتییە سیاسی و دیپلۆماسییەی كوردستان ڕێزدار نێچیرڤان بارزانیی سەرۆكی هەرێمی كوردستانی پێ دەناسرێتەوە و بووە كە بارزانی خاوەن هێزێكی نەرمە لە بیر و مامەڵەكردندا، چەقبەستوو ترین دۆخەكان دەخاتەوە جوڵە، خاوەن دیپلۆماسییەتێكی بەهێز و وردبینیەوە  لە مامەڵەكردن، توانای شكاندنی بەستەڵەكەكانی هەیە، دۆستی دانوستان و گفتوگۆیی ئاشتییانەیە، خاوەن ئیرادەیەكی پۆڵاینە بۆ سەركەوتن بەسەر ئابڵوقە و قەیرانەكان،  خاوەن ژیری ، لێزانیی و كارامەییەكی زۆرە بۆ فەراهەمكردنی كەشی تایبەت بە گفتوگۆ و دۆزینەوەی خاڵی هاوبەش و لێكتێگەیشتن و هونەری  دروستكردنی متمانە وباوەردروستكردن ، بۆیە لە هەمووان زیاتر پراكتیزەیی ئەم هێزە هاوچەرخەی ناوچەیی و جیهانی دەكات كە هێزی نەرمە. هەڵسوكەوت و خەسلەت و جوڵە دیپلۆماسی و سیاسییەكانی ڕێزدار نێچیرڤان بارزانی سەرۆكی هەرێمی كوردستان لەرابردوو و ئێستاش درێژەپێدەری هەمان رێباز و قوتابخانەیە كە سەرۆك مسعود بارزانی و شەهیدی هەمیشە زیندوو " ئیدریس بارزانی " بەردەوامی هەیە بەتایبەت لەو كات و ساتانەی كە گەلی كورد و دۆزە رەواكەی لە نێو سەختترین باردۆخەكاندا  ولێواری بێ‌ ئومێد دا بووەخەباتی چەكداری و پەنابردنە بەر چیاكان لەبەردەم  گەلی كورددا تاكە بژاردە بوو،  توانییان دەرچەی نوێ و مەدەنییانە بۆ داواكردنی  مافەكانی گەلی كورد بدۆزنەوە، لە ڕێگای هەوڵە دیپلۆماسییەكان بۆ ئەنجامدانی دانوستان و گفتۆگۆ و ڕێككەوتننامە، كە بەرهەمەكەی ئاشتی و ئارامیی و تەبایی لێ بەدەستهات بۆ كوردو كوردستان.  كە دواتریش بووە هەوێنی دانانی بناغەی  بەرەی كوردستانی. هەر ئەم  یەكدەنگییەش بووە داینەمۆ و بڵێسەی ڕاپەڕینی سەرتاسەری و ڕزگاری ئەم بەشەی كوردستان  و پێكهێنانی ئەم قەوارەیە كە بەرهەمی خەباتی چەندین ساڵە و خوێنی شەهیدان وماندوووبوونی پێشمەرگەیە .ئەمەش زیاتر ئومێدی هەڵچنی بۆ  دروستكردنی كەشێكی ئاشتیانە و كۆكردنەوەی سەرجەم  هێز و لایەنە سیاسییەكان، لە ژێر چەتری سەرۆكایەتی هەرێم، بەهەمان ڕۆحیەت و نەفەسی دیبلۆماسیی، كە ببێتە كلیلی كردنەوەی كۆدی ناكۆكییەكان، داینامیكیەتێك بخاتەوە دۆخی  چەقبەستوو، ببێتە ئامڕازی كردنەوەی گرێوگۆڵەكان. ئەمڕوش هەموو ئەو هەوڵانە لە چوار چێوەی  پارێزگاریكردن لە دەستكەوتەكان و شكۆ و ئیرادە و سەروەری كورد وكوردستانە.