2022-02-01 [07:05 AM]

د رۆژەکا وەکی ئەڤرۆ دا ل ساڵا ٢٠٠٤ کۆ رۆژا جەژنا قوربانا پیرۆز بوو دەستێن تیرۆرستێن تاریک پەرست گەهشتە هەولێرا پایتەخت و د دوو کریارێن خۆ کوژی دا ل بارەگای لقا دوو یا پارتی دیموکراتی کوردستان و مەڵبەندێ سیێ یێ ئێکەتیا نشتیمانی کوردستان زێدەتر ( ١٠٠ ) وەڵاتیێن سڤیل و بێ گۆنەهــ هاتنە شەهیدکرن و زۆر ژ وان بەرپرس و فەرماندە بوون . 
ڕاستە ئەڤە کریارەکا تیرۆرستی بوو، لێ د بنەڕەت دا کریارەکا هۆڤانە بوو ژلایێ تیرۆرستێن لادەر ل بنەما و ڕەووشت و ئاینێن ئاسمانی و دژی پێشڤەچوونا قەوارێ هەرێما کوردستانێ و ئێکڕێزیا پارت و ئالیێن سیاسی یێن کوردستانی ، چونکی دەسپێکا لێکنێزیکبوونا پارتیێن کوردستانی بوو بنایبەت پارتی دیموکراتی کوردستان و ئێکەتیا نشتیمانی کوردستان و پشکداریا وان وەکی نوونەرێن خەلکێ کوردستانێ ل سازیێن دەولەتا نوو یا ئیراقا پشتی دکتاتۆریەتێ ، ڤێ ئێکرێزیا کورستانی چاڤێن دوژمن و  نەیارا تاریکر و  ترسا خودایێ مەزن دناڤ دلێ واندا نەما بوو لەوا پەنا برە بەر ڤێ کریارا هۆڤانە و نەمرۆڤانە . 
گرۆپێن تیرۆرستی د وێ باوەریێدا بوون ب شەهیدکرنا هژمارەکا کادر و فەرمادە و پلەدارێن ڤان هەردوو پارتا رۆلێ نوونەرێن هەرێما کوردستانێ د ئاڤاکرنا ئیراقا دیموکراسی و فیدڕالی دێ لاواز بیت و نەشێن ماف و مستەحەقاتێن هەرێمێ و خەلکێ وێ دناڤ دەستوورێ ەردەمی دا بچەسپینن و دانپێدانێن فەرمی د ئیراقێدا ب قەوارێ هەرێما کوردستانێ ناهێنەدا ، ژلایێ ئاسایشا ناڤخۆیی یا هەرێما کوردستانێ ژی ڕەوشەکا نە سەقامگیر دێ پەیدا بیت و کۆنترۆلکرنا وێ دێ لدەستێ هەرێما کوردستانێ و سازیێن وێ یین ئێمناهیێ دەرکەڤیت . 

تیرۆرستێن بناڤێ ئیسلامێ کۆ د راستی دا دژی بنەمایێن ئایینێ پیرۆزێ ئیسلامێ نە ئەوێن  دکریارا تیرۆرستیا ( 1 ) شوباتا ( 2004) ێ د رۆژەکا پیرۆز دا جوداهی دناڤبەرا ژن و زارۆک و پیر و گەنجا ، خەلکێ بەرپرس و نەبەرپرس و سڤیل و پێشمەرگە ، ئایین و ئەتن و پێکهاتێن جودا نەکری و هەمی کرینە   ئارمانج ...!   بریارا خۆ ئاشکرا کر و دژی ماف و ئازادی و پێشڤەچوون و ئێکرێزیا خەلکێ کوردستنێ نە ، دژی ئیراقەکا دیموکراتی و ئازاد و فیدرالن کۆ مافێن هەمی نەتەوە و ئایین و پێکهاتدا تێدا د پاراستی بن .      

لێ پلان و ئارمانجێن وان سەرنەگرتن و پشتی وێ کارەساتێ هەتا نهۆ هەرێما کوردستانێ وەکی قەوارەیەکێ سیاسی و کارگێری یێ  یاسایی و دستووری بهێزتر دبیت و پێشڤە دچین و د هندەک بوواران دا مینا وەڵاتەکێ سەربەخوو سەرەدەری دگەل دهێتە کرن و ب حیکمەتا سەرکردایەتیا سیاسیا کوردستانێ و بەری هەمیا سەرۆک مەسعوود بارزانی رێگری ل کووربوونا ناکۆکیێن هەرێمێ و بەغدا هاتە گرتن کۆ ببنە ناکۆکیێن نەتەوی دناڤبەرا  ( کورد و عەرەب ) ان دا ، هەر وەکی رێکخستێن تیرۆرستی و هندەک نەتەوە پەرست و شۆفینیا هیڤی بۆ دخاست و پلان بۆ دادرشتن ، ژلایێ ئێمناهی ژی ب هشیاری و چاڤزلیا هێزێن ئێمناهی و پێشمەرگەهی ب پشتەڤانیا خەلکێ دلسۆزێ هەرێمێ ، هەرێما کوردستانێ وەکی گزیرتەکا ئێمن و سەقامگیر دناڤ ڤۆلکانەکا ئاگرین مایەڤە و هەرێما کوردستانێ بتایبەت سەرۆک بارزانی و پارتی دیموکراتی کوردستان بوونە کلیلا چارەسەریا پرس و ئاریشە و ناکۆکیێن پێکهات و ئالیێن سیاسی یێ ئیراقێ . 

کارەساتا خویناویا ئێکێ شوباتێ دبێژیتەمە ، دۆژمن و نەیارێن کورد و کوردستانێ ، ئێکبوون و ئێکرێزیا هێز و ئالیێن سیاسی یێن کوردستانێ ب مەرسی لسەر بەرژەوەند و ئاسایشا خۆ یا نەتەوەی و نشتیمانی دزانن ، لەوما پێتڤی یە  ئالیێن کوردستانێ ئێکرێزی و ئێک گۆتاریا خۆ ب فاکتەرێ پێشڤەچوون و پاراستن و ئێمناهیا کوردستانێ و قەوارێ هەرێما کوردستانێ بزانن و بەرژەوەندێن تایبەت و حزبایەتی بکەنە قوربانی بەرژەوەندێن گشتی و ئێکرێزیا کوردستانی ڕابگەهینن کۆ هیڤی و ئارمانج و داخازیا خەلکێ کوردستانێ یە .