2022-01-19 [09:06 AM]

هەمی حزب و  ڕێکخرا و ئیدارا  پڕۆگرام و پەیڕە و یاسا و کارنامێن خۆ یێن تایبەت هەنە ، لێ کاپێ نەکرنا وان دبیتە ئەگەرێ سەرهەلدانا  کارێن نە یاسایی و کارکرنا پلەدارا بۆ پاراستنا بەرژەوەندێن خۆ و سەرهەڵدانا گەندەڵیێ ، زۆر جارا ل کوردستانێ بۆ موکومکرنەڤا ئۆرگانا و رێگریکرن ل کار و رەفتارێن نە یاسایی و گەندەڵیێ جهێن بەرپرس و پلەدارا دهێنە گۆڕین ، نە گۆڕانکاری .

پارتی دیموکراتی کوردستان وەکی دەستهەڵاتا ئێکێ ل کوردستانێ و خودانا مەزنترین هێزا جەماوەری بتایبەت ل دەڤەرا بەهدینان ، پشتی هەلبژارتنێن بووری یێن جڤاتا نوونەرێن ئیراقێ گەهشتیە باوەریێ کۆ پشکەکا زۆرا جەماوەرێ وێ گلە و گازندە هەنە و ل رەفتارێن هژمارەکا زۆرا بەرپرسێن دەڤەرێ د نەڕازینە ، چونکی کێمیا پشکداریا خەلکێ دەڤەرێ د وان هەلبژارتنا جهێ حیبەتیێ بوو ..! لەوما ئەنجامدانا گۆڕانکاریێن بەرپرس و پلەدارا بوویە مژارا گەرما جادێ و کادرێن ئۆرگانێن خوارێ ، ئەڤێ چەندێ دلخۆشی و گەشبینی بۆ درۆست کریە . 
پێتڤی یە گۆڕانکاری ببنە پرنسیپ و گاڤەکا نووڕمال نەک پەیام و نۆچەیێن گەرم و گرنگ ، لێ ئەوا ل گۆڕانکاریا گرنگتر سیستەمکرنکا کارێ پارتایەتی یە ، باشترە بێژین کارکرن ب سیستەمێ کارێ پارتایەتی کۆ کارپێکرنە ب پرۆگرام و پەیڕەوێ ناڤخۆیی و ڤەگەڕاندنا پارتی دیموکراتی کوردستانە بۆ ڕاستیا بنەمایێن ڕێبازا بارزانی کۆ رێبازەکا گشتگیرا مرۆڤایەتیێ و نەتەوایەتیێ و نشتیمانیێ و کارگێریێ یە . 

چونکی رێبازا بارزانی باشترین رێک بۆ شێوازێن سەرەدەری و رێڤەبرنێ و پەیوەندی و دبلۆماسیەتێ دانا و ئەگەر رێبازا بارزانی هاتبا پەیڕەوکرن  جهێ گەندەڵیێ و نە دادوەریێ دبن دەستهەڵاتا پارتی دا نەدبوو ، مینا سەردەمێن بەرێ . 
خەلکێ دلسۆز و نشتیمان پەرەوەر بەری کادر و ئەندامێن پارتی ل هەلبژارتنا ب مال و خێزانڤە دا چنە بنگەهێن دەنگدانێ و دەنگی دەنە کاندیدێن پارتی. 

ئەگەر ڕاستە پارتی لبەرە گۆڕانکاریا بکەت کۆ گاڤەکا پیرۆز و گرنگە لێ دگەل ڤێ چەندە پێتڤی رێبازا پیرۆزا بارزانی و پڕۆگرام و پەیڕەوی بکەتە چارچۆڤێ کارکرنا ئۆڕگان و پلەدارێن پارتی و لدیڤ بنەمایێن وان سەرەداری لگەل خەلکی بهێتەکرن و دەست نیشانکرنا کادران ژی بۆ رێڤەبرنا ئۆڕگانان لسەر هەما رێباز و پەیڕەو بیت ، نەک هەر بەرپرسەک لدیف بەرژەوەندێن خۆ هزرێن خۆ بکەتە رێباز و پرۆکرام و پەیرەو و لسەر دور و بەر بسەپینیت ..!    

مەبەست نە ئەوە هەمی بەرپرس و پلەدارێن پارتی بڤی ڕەنگی نە ، مە و خەلکی  ڕێزێن تایبەت بۆ ژمارەکا کادر و پلەدرێن دلسۆز و خەمخۆر هەنە ، لێ ب ڕەنگەکێ گشتی کارکرن ب پڕۆگرام و پەیرەوی و رێبازا پیرۆزا بارزانی زۆرا کێم بووی ، لەوما ڕەوش گەهشتیە ڤی ئاستەی ، ئەز باوەرم ئەگەر پارتی سیستەمێ خۆ کاراتر ب چەسپینیت ، هێزا وێ یا جەماوەری دێ دوو سێ بەرامبەر بیت و هەوجەی پرۆژە و یاسایێن چاکسازیێ و  بەرهنگاریا گەندەڵیێ ژی نابین .