|
نوسینی : رێبوار حەمەلاو شوانی دوای هەڵبژاردنی پەرلەمانی عێراق لە رۆژی 10ی 10ی 2021 و ئینجا یەكلابوونەوەی ئەنجامەكان و سەنگی لایەنە سیاسییەكان و شكستی گەورە بۆ ئەوانەی كە 15 ساڵە سەروەت وسامانی عێراقیان بەتاڵان وفیرۆدا و جارێكی دیكە بەرەو تاكڕەویی و دیكتاتۆری گەڕاندنەوە ، هەر چەندە ئەنجامی هەڵبژاردنەكان لە لایەن كۆمەڵگەی نێودەوڵەت و بە وڵاتانی ناوچەكەشەوە پەسەندی ئەنجامی هەڵبژاردنی پێشوەختەی ئەنجوومەنی نیشتیمانی عێراقیان كرد .
بۆیە، دەتوانین بڵێین كە ئەنجامی ئەو هەڵبژردنانە دەرخەری ڕاستییەكی حاشاهەڵنەگرە كە ، ئەوانەی كە بریاری تاكڕۆیانەیان دا و خواست و ویستی عێراقییەكانیان پاشگوێ خست و دەستووریان پاشگوێ خست و بارودۆخێكی یان هێنانە ئاڕاوە تا لە رووی هێز و پێگەی جەماوەرییان لە ناو خەڵك لاواز بێت و ئەوەش بووە هۆی ئەوەی هاوسەنگی پرۆسەی سیاسی عێراق بەرامبەر ئەو حیزب و لایەنانە گۆڕانكاری ڕیشەیی بە سەردا بێت و تووشی شكستی گەورە و چاوەروانكراو و لەناوكاو بن .
لە هەر وڵاتێك كە دا كەتێیدا باوەریان بە بنەماكانی دیموكراسی و مافی خەڵك هەبێت ، سەڕەتاییترین ماف دەستینشانكردنی نوێنەرانی لە نێو ئۆرگان و دامەزراوەكاندا ، هەروەها مێژووش ئەو ڕاستییەی سەڵماندووە كە چ هێزولانێك خزمەتی بەرژوەندییە باڵاكانی گەل و نیشتیمانەكەی بكات
خاوەنی مێژووی پڕ لە دەستكەوت و شانای بێت، دەیباتەوە و ئەوانی دیكەش دەدۆڕێن، دۆڕان بە مانا شموولییەكەی، واتا پێویستیان بە بەخۆداچوونەوە و گوێگرتنە لە ڕای گشتی و تێكەڵاوبوونە لەگەڵ موعانانی عەوام و نەهامەتییەكانی كۆی خەڵك.
ئەوەی جێگەی هەڵوەستەكردنە ئەوەیە كە، دوای 100 ساڵ عێراق نەك هەر پەند و وانەی لە مێژوویی پر كارەساتباری دەسەڵاتی دیكتاتۆری و خۆسەپاندن و شۆڤێنی و مەزهەبگەرایی و تایفی وەرنەگرت و نەیتوانیی خزمەتكاری خەڵكەكەی بێت و ئەمنییەت و ئارامی دابین بكات ، بەڵكو بەدرێژایی مێژوویی دروستكردنی عێراق بەردەوام پێشێلكاری و خۆسەپێنەر بووە بەتایبەت بەرامبەر بە گەلی كورد ، كە تێیدا پرۆسەی كیمیاباران وكۆمەڵكوژی و وێرانكاری زۆری لە ئەنجامی بە زۆر لكاندنی گەل و خاكی كوردستانی لێكەوتۆتەوە تا بە ئەمڕۆ ئەو زێهنیەتە قێزەوەنە درێژەی هەیە .
بۆیە، دەسەڵاتدارانی عێراق ، هیچ كات باوەریان بە بنەماكانی پێكەوە ژیان ، سازان ، پێكەوەهەڵكردن نەبووە و بەردەوام بە زێهینەیەتی توندوتیژی و سڕینەوە و دوور لە گفتۆگۆ و لێكتێگەیشتن و بە ئاگرو ئاسن كاریان كردووە و هەمیشە دەسەڵاتدارانی بەغدا تەنها لەخەمی كورسیی و پۆست و بەرژوەندییە تایبەتییەكان یان بوونە و هیچ كات باكیان بۆ ماف و چارەسەری و گەڕاندنەوەی مافی نەتەوە و پێكهاتە و ئایین و ئایینزا جیاوازەكان نەبووە تا هەڵێك بۆ پێكەوە ژیان و خۆشەویستی بێتە ئاڕاوە .
بۆیە، ئیتر كاتی ئەوە هاتووە كە سەركردایەتیی سیاسی كوردستان بە یەكدەنگ و بەهێزەوە و بە چاودێری زڵهێزان و نەتەوە یەكگرتووەكان بە حكومەتی ئایندەی عێراق بڵێن كە دیموكراسی واتا ، جێبەجێكردنی مافەدەستوورییەكان و جێبەجێكردنی رێكككەوتننامەكان و هەموو ئەو بڕگە دەستوورییانەكانی كە چەندین ساڵە حكومەتەكانی رابردوو خۆیان لە جێبەجێكردنی پاشگەز دەكەنەوە .
ناكرێت ، چیتر بە چاویی پلە دوو مامەڵە لەگەڵ گەل و هەرێمی كوردستان بكرێت و هەر جارەوە بە سیناریۆیەك پەراوێز بخرێن ، ناكرێت چیتر گاڵتە ویاری بە چارەنووسی گەلێكی ستەمڵیكراویی وەك كوردستان بكرێت ، ئەگەر مافەرەوا دەستوورییەكانمان جێبەجێ نەكرێت ، ئەوا كارتی زۆرمان هەیە تا بە شێوەی یاسایی و وەك مافێكی رەوا دژی دەسەڵاتدارانی بەغدا بەكاری بێنین و هیچی دیكە باوەرمان بە گفت و بەڵێنی درۆ و كات بە فیرۆدان نەماوە كاتی كردەوەیە ..
ئەم هەواڵە 2158جار خوێندراوەتەوە |
