2021-09-27 [11:19 AM]

ب درێژاهیا دیرووکێ سەرخۆبوونا کوردستانێ هیڤی و ئارمانجا خەلکێ کوردستانێ بوویە و بۆ بدەست ڤەئینانا ڤێ ئارمانجێ خەلکێ کوردستانێ خەبات کریە و قوربانیێن بێ هژمار داینە . 

هەمی شۆڕەشێن کوردستانی ژی هەر ل سەردەمێ شێخ مەحموودێ حەفید و لدیفڕا شۆڕەشێن بارزان و پاشان دامەزراندنا پارتی دیموکراتی کوردستان بۆ رێکخستنا جڤاکی و دارشتنا نەخشێ رێکا سەرخۆبوون و ئازادی و رزگاریا کوردستانێ و شۆڕەشا مەزنا ئیلوونێ ب سەرۆکاتی و سەرپەرشتیا پارتی دیموکراتی کوردستان و بارزانی نەمر کۆ مەزنترین شۆڕەشەکا نشتیمانیا کوردستانی بوو پاشان شۆڕەشا گۆڵانا پێشکەفتنخواز ب سەرۆکایەتا سەرۆک مەسعوود بارزانی و ب ڕێنمایی یێن بارزانی نەمر هەر بۆ ڤێ مەرەمێ هاتنە بەرپاکرن و سەرهەلدانا پیرۆزا خەلکێ کوردستانێ ژی دیسان ب مەبەستا ئازادی و رزگاری و سەرخۆبوونا کوردستانێ بوویە . 

لێ بزاڤا رزگاریخوازیا کوردستانێ ب سەرپەرشتیا پارتی دیموکراتی کوردستان بۆ گەهشتن ب رزگاری و  سەرخۆبوونێ کریە قۆناغ ب قۆناغ داکۆ دەرفەتێن پێتڤی بۆ بهێنە ڕەخساندن . 
هەر ل مافێن پەروەردەیی و رەوشەنبیری و کارگێری دەستپێکریە تا گەهشتیە دیموکراسیکرنا عیراقێ و  ئۆتۆنۆمیێ ڕاستەقینە و فیدرالیەت  و بریارا ڕاپرسیا سەرخۆبوونا کوردستانێ . 

بریارا ڕاپرسیا سەرخۆبوونا کوردستانێ پشتی بێهیڤیبوونا خەلکێ کوردستانێ و سەرکردایەتیا وێ هات ب تایبەت پارتی دیموکراتی کوردستان و سەرۆک بارزانی ، کۆ سیاسی و دەستهەڵاتدارێن عیراقێ نە باوەری ب دیموکراسیەتێ هەیە نەژی دەستوورێ هەردەمیێ عیراقێ لسەر بنەمایێ فیدڕالیەتێ و مافێن خەلکێ خەلکێ کوردستانێ . 

چونکی بەردەوام مافێن خەلکێ کوردستانێ یێن دەستووری پێشێل دکەن و هەستا شۆفینیەت و مەزهەبیێ لسەر پشکەکا زۆرا سیاسیێن عیراقێ یا زاڵە . 
لەوما وەکی مافەکێ سرۆشتی و یاسایی و دەستووری خەلکێ کوردستانێ ب دەسپێشخەری و سەرپەرشتیا سەرۆک مەسعوود بارزانی ب پشتەڤانیا هندەک ئالیێن سیاسیێن نشتیمانی بەرەڤ ڕاپرسیا سەرخۆبوونا کوردستانێ چوو و لرۆژا ( ٢٥ ) ئیلوونا ساڵا ٢٠١٧ ب رێژەیا زێدەتر ل ٩٣٪  خەلکێ کوردستانێ ب دەنگێ بەلێ بۆ سەرخۆبوونا کوردستانێ دا . 

پشکداریا خەلکێ کوردستانێ ب هەمی تەخ و چین و ئۆل و ئەتن ب گەرم و گۆڕی و هەستا بلندا نەتەوی و نشتیمانی بڤێ رێژەیا بلند ل راپرسیا سەرخۆبوونێ نیشانێ درۆستی و ڕەوایەتیا ڤێ بریارا دیرۆکی بوو ئەوا ژلایێ سەرۆکێ هەرێما کوردستانێ مەسعود بارزانێ هاتیە دان و پڕاکتیزەکرن .

بەڕەڤیا خەلک و پشمەرگەهێ کوردستانێ بتایبەت یێن پارتی دیموکراستان ب سەرپەرشتیا سەرۆک مسعود بارزانی ل وان هێرشێن نە ڕەوا و دۆر ل پرنسیپێن مرۆڤایەتی و ئەخلاقی و دید و بۆچوونێن ئازاد و دیموکراسی یێن خەلکێ کوردستانێ پشتی خیانەتا نشتیمانیا لایەنەکێ دیار ل ١٦ ێ ئکتۆبەرا ساڵا ٢٠١٧ ئەوێن ژلایێ لەشکرێ دەولەتا عیراقا شوفینی و هندەک میلیشیایێن عیراقی و هەرێمی یێن پارێزەر و سەپاندنا هزرا تایفی بۆ سەر قەوارێ هەرێما کوردستانێ و دەستکەفتێن خەلکێ کوردستانێ، نیشانێ بەڕەڤانیکرنا خەلکێ کوردستانێ بوو ل ڕەئی و بریارا ڕاپرسیا سەرخۆبوونا کوردستانێ و ئەو  سەرکەفتنێن گەلێ کورد بەڕامبەر وان هێرشێن مەزن و دژوار و وان قەیران و گەمارۆیێن سیاسی و ئابووری و دەروونی ، نیشانێ حەز و ئاڕەزوویا خەلکێ کوردستانێ یە بۆ سەرخۆبوونێ .

ساڵڤەگەڕا ڤێ جارێ یا ڤێ بۆیەرا دیرۆکی و نشتیمانی یا خەلکێ کوردستانێ هەڤدەمە دگەل هەوار پڕوپاکندێن هەلبژاردنێن جڤاتا نوونەرێن عیراقا فیدڕال . 
پێتڤی یە خەلکێ کوردستانێ ڤێ روودانێ بەرێکڤەبدەت و سەرپەرشت و پێشەوایێن ڤێ ڕاپرسیێ و ئەو لایەنێ بەڕەڤانی ل رەئی و بریارا خەلکێ کوردستانێ کری، بکەتە نوونەرێن خۆ ل جڤاتا نوونەرێن عیراقێ ، کۆ پارتی دیموکراتی کوردستانە ، چونکی سیاسەت و دبلۆماسیەت و بەرەڤانیا پارتی بوویە ئەگەرێ پاراستن و مانەڤا قەوارێ هەرێما کوردستانێ و هەڵوەشاندنا پیلانێن عیراقی و  هەرێمی دژی کوردستانێ . 
نوونەرێن پارتی ژی دناڤ دەولەتا عیراقێ ب هەمی سازیێن خۆڤە هەتا نهۆ تاکە بەڕەڤانکار بوونە ل ماف و شایستێن یاسایی و دەستووریێن خەلکێ کوردستانێ و ل داهاتی ژی دا نوونەرێن پارتی دێ ب هێزەکا مەزنتر بەڕەڤانیێ ل کوردستانێ و خەلکێ وێ کەن ، ب تایبەت چەسپاندنا ماددێ ١٤٠ ێ دەستووری و ڤەگەڕاندنا دەڤەرێن کوردستانی یێن دەرڤەی ئیدارا هەرێما کوردستانێ ئەوێ دەمێ چار ساڵایە هاتینە داگیرکرن . 
هەر وەسا پێتڤی یە خەلکێ کوردستانێ خیانەتکارێن ١٦ ێ ئکتۆبەرێ ب دەنگ پێنەدانێ سزا بدەت ، ئەو لایەنێ کۆ بوویە ئەگەرێ داگیرکرنا کوردستانێ و ساپاندنا قەیرانێن ئابووری . 
ئەز باوەرم ئەڤ هشیاریە لدەف خەلکێ کوردستانێ هەیە .