2021-09-09 [11:31 AM]

شێستەمین ساڵڤەگەرا ئەڤ ساڵە یا بەرپابوونا شۆڕەشا مەزنا ئیلوونێ کەفتە د هەوا بانگەشا هەلبژارتنێن پێشوەخت یێن جڤاتا نوونەرێن عیراقا فیدرال ، ئەو شۆڕەشا ل ١١ ێ ئیلوونا ساڵا ١٩٦١ ژلایێ پارتی دیموکراتی کوردستان و ب سەرپەرشتی و رێبەریا نەمر مەلا مستەفایێ بارزانی هاتیە بەرپاکرن ل ژێر درۆشمێ دیموکراسی بۆ عیراقێ و ئۆتۆنۆمیێ راستەقینە بۆ کوردستانێ ( باشوورێ کوردستانێ ) . 

هەرچەندە ئەڤ شۆڕەشا مەزن ب شیانێن سنووردار یێن مادی و لەشکری بەرامبەر لەشکرەکێ بهێز و خودان شیانێن بێ سنوور یێن ماددی و چەکداری یێن دەولەتا عیراقێ بەرپا بوو و پشتی نێزیکی ۹ ساڵێن بەردەوامیا شۆڕەشا چەکداری ، شۆڕەشێ سەرکەفتنێن مەزن و بێ وێنە بدەست ئینان و پشکەکا زۆرا ئارمانجێن شۆرەشێ بەرەف بدەست ئینانێ بوون ، ئەڤێ چەندێ ژی چەند ئەگەر و نهێنی هەبوون . 
 ئێک : هەبوونا رێبەر و سەرکردەکێ لێزان و دووربین و کاریزما و شۆڕەشگێر و دادوەر و خودان باوەریەکا بهێز ب دووزا گەلێ خۆ و ئازادی و رزگاریێ ، ئەو ژی بارزانیێ نەمر . 
دوو : هەبوونا رێکخستن و دیسپلینەکا بێ وێنە دناڤ شۆرەشگێران دا . 
سێ : چەسپاندنا گیانێ تەبایی و ئێک رێزیێ دناڤ شۆڕەشێ و کوردستانێ دا . 
چار : پەروەردەکرنا هژمارەکا زۆرا کادرێن سیاسی و لەشکری  یێن خودان هەستەکا بلندا نەتەوی و نشتیمانی . 
پێنج : بەڵاڤبوونا رێکخستنێ پارتایەتی ل سەرتاسەرێ کوردستانێ و هندەک باژێرێن عیراقێ ژوانا بەغدا یا پایتەخت ، کۆ پشتەڤانیەکا زۆرا شۆرەشێ بوون .
شەش : کۆمکرن و لێکنێزیک کرنا هەمی تەخ و چینێن جڤاکێ کوردستانێ ، یێن جڤاکی و رەوشەنبیری دناڤ شۆڕەشێ . 
حەفت : چەسپاندنا گیانێ مرۆڤایەتیێ و مافێن مرۆڤ و رێزگرتنێ د گەرمە گەرما شەری دا . 
هەشت : دابینکرنا ئازادی و مافێن ئەتن و ئایینێن جودا .
نەهـــ : کارکرن و سەرەدەریکرن لسەر بنەمایێن دیموکراسیەتێ .   
دەهــ : هەبوونا  لێبۆرینا گشتی و  
ئاشتەوایا جڤاکی . 
ئەڤ خالە و چەندین خال و ئەگەرێن دیتر بونە رەوشتێن شۆڕەشا مەزنا ئیلوونێ کۆ ئەگەرێن وان سەرکەفتن و دەسکەفتێن مەزن بوون مینا تۆمارکرنا چەندین داستانێن لەشکری یێن بێ وێنە و دانپێدانا رژێما عیراقێ ب مافێ ئۆتۆنۆمی ب رێکەفتنا دیرۆکیا ١١ ێ ئادارا سالا ١٩٧٠ ێ یێ کۆ بڤێ رێکەفتنێ دووز و پرسیا سیاسی و نشتیمانی و نەتەوایەتیا کوردستانێ برە قۆناغەکا پێشکەفتیتر و کرە پرسەکا نیڤ دەولەتی .  
فیدرالیەتا ئەڤرۆ یا کوردستانێ ژی لسەر بنەما و پلا و ستراتیژیەکا شۆڕەشا مەزنا ئیلوونێ ب رێبەریا پارتی دیموکراتی کوردستان بدەست هاتیە . 

ئەڤە وێ چەندێ دگەهینیت کۆ پارتی و پەیرەوکارێن رێبازا بارزانی هەلگر و بەڕەڤانکارێن هیڤی و ئارمانج و داخازیێن خەلکێ کوردستانێ نە و پیرۆزیێن خەلکی ژی مینا ئاخ و ئاڵا و مارشا نشتیمانی و پێشمەرگەهــ و زمان و کلتۆر ...هتد لسەر دەستێ وان هاتینە پاراستن و دهێنە پاراستن . 

د عیراقا نوو ژی دا سەرۆک بارزانی و نوونەرێن پارتی دناڤ سازیێن دەولەتا عیراقێ بەرەڤانکارێن ڤان ماف و ئارمانج و پیرۆزیا بوونە . 
لەوما پێتڤی یە ل ڤان هەلبژارتنان دا  خەلکێ کوردستانێ رۆلێ پەرلەمانتار و نوونەرێن پارتی دناڤ عیراقێ دا ژبەرچاڤ بگرین و ژبووی پاراستنا دەسکەفتێن کوردستانێ و مافێن کوردستانێ دەنگی ب کاندیدێن پارتی ، چونکی گرانیا سەنگا پارتی د عیراقێ دا گرانیا سەنگا خەلکێ کوردستانێ یە و پەرلەمانتارێن پارتی ئەو فراکسیۆنا ئێکگرتی و ئێک هەڵویستی و ئێک بریاری یە ئەوێن شەرێ دەستووری و یاسایی لسەر پاراستنا قەوارێ هەرێما کوردستانێ و دەسکەفتێن خەلکێ کوردستانێ دکەن . هەر وەکی ل دەمێن بۆری ئەڤ شەرە کری و رێگری ل دەرکرنا چەندین یاسا و بریارێن دژی کوردستانێ کری . 
بەرۆڤاژی پەرلەمانتارێن هندەک پارتیێن کوردستانێ ئەوێن بووینە پشکەک ل چەندین بریارێن دژی خەلکێ کوردستانێ مینا بڕینا بۆدجە و مۆچێ خەلکێ کوردستانێ و یاساییکرنا حەشدا شەعبی و داگیرکرنا کوردستانێ و ماف و ئمتیازاتێن پێشمەرگەی .

ئەوا ژ هەمیێ گرنگتر کۆ پارتی کار لسەر کریە و ل داهاتی زێدەتر دێ کار لسەر کەت چەسپانا ماددێ ١٤٠ ێ دەستووری و رێگری کرنێ ل راستڤەکرنا دەستوورێ هەردەمێ عیراقێ بتایبەت ئەو خال و بەندێن د بەرژەوەندا خەلکێ کوردستانێ .

پێتڤی خەلکێ کوردستانێ ب هەستەکا بلندا نشتیمانی و شۆڕەشگێری یا مینا پێشمەرگەهێن شۆڕەشا ئیلوونا مەزن پشکداری دڤان هەبژارتناندا بکەت و بێ دوودلی دەنگی ب کاندیدێن پارتی بدەت داکۆ ئەو هیڤی و ئارمانجێن خەلکێ کوردستانێ یێن پارتی و رێبازا بارزانی ل شۆڕەشا ئیلوونێ بناغە بۆ دانای بجهــ بهێن ئەو ژی ئازادی و رزگاریا کورد و کوردستانێ و گەشەسەندنێن ئابووری و جڤاکی و پەیوەندیێن دبلۆماسی نە ل کوردستانێ و ئێکرێزیا هێز و ئالیێن کوردستانی یە و سەر ئاستێ عیراقێ ژی چەسپاندنا  سیستەمێ  دیموکراسی و فیدالیەتێ و  ئاشتەوایا جڤاکی یە .