 |
|
|||
نڤیسینا : غیاس خالد زێبارى پشتى گۆڕانكاریێن نه‌چاڤه‌رێكرى یێن سیاسى و له‌شكرى ل وه‌ڵاتێ ئه‌ڤغانستانێ و زڤراندنا بزاڤا تالیبان بۆ سه‌ر ده‌ستهه‌ڵاتێ بێ شه‌ر، باشتره بێژین ب رێكه‌فتنه‌كا سیاسى دناڤبه‌را وێ بزاڤێ و وه‌ڵاتێن ئێكگرتى یێن ئه‌مریكا . ئه‌و بزاڤا چه‌كداریا ئۆَلى ئه‌وا به‌رى بیست ساڵا ژلایێ ئه‌مریكا ب هێزا چه‌كى ل ده‌ستهه‌ڵاتێ لاداى و ب رێكخستنه‌كا تیرۆرستى دناساند . هه‌رچه‌نده ئه‌مریكا و هه‌ڤپه‌یمانێن وێ دڤان بیست ساڵێن بوورى دا هه‌مى رێك بكارئینان بو ئاڤاكرنا ده‌وله‌ته‌كا نوو یا بێ تالیبان ل ئه‌ڤغانستان لسه‌ر بنه‌مایێ دیموكراستى و مه‌زاختنا ب سه‌دان مه‌لیار دۆلارا ل ئاڤاكرنا وه‌ڵاتى و له‌شكره‌كێ بهێز و ئیداره‌كا ساغله‌م و دادوه‌ر و چاكساز ، لێ ڤان هه‌مى رێكا سه‌رنه‌گرتن . ل دووماهیێ ب رێكه‌فتنه‌كا سیاسى و لده‌مه‌كێ كۆرت دا ئه‌و وه‌ڵات پشتى ڤه‌كێشانا له‌شكرێ، ئه‌مریكا و هه‌ڤپه‌یمانێن وێ كه‌فته دده‌ستێ وێ بزاڤێ ئه‌وا ئه‌مریكا ب هزاران له‌شكرێن خۆ ژ پێخه‌مه‌ت ژناڤبرنا وێ ب كوشتن داى...! هه‌ر ل لده‌سپێكا ڤێ بریار و رێكه‌فتنا ئه‌مریكا به‌رامبه‌ر ئه‌ڤغانسان، هنده‌ك نڤیسه‌ر و چاڤدێرێن سیاسى و سازیێن مه‌دیایى ب كۆپیكرنا سیناریۆیا ل ئه‌ڤغانستانێ ل عیراقێ پشتى ڤەكێشانا هێزێن ئه‌مریكا ل عیراقێ گۆتار و په‌یام به‌ڵاڤكرن دا دیاركرن كۆ مه‌ترسى لسه‌ر هه‌رێما كوردستانێ هه‌یه و ئه‌وا بسه‌ر خه‌لكێ ئه‌ڤغانستانێ هاتى دێ بسه‌ر خه‌لكێ كوردستانێ ژى هێتن. ڤان په‌یام و گۆتارا هه‌تا راده‌یه‌كى ترس ئێخسته دناڤ خه‌لكێ كوردستانێ بێ كۆ جوداهیێن جڤاكى و سیاسى و ئه‌تنى یێن كوردستانێ و عیراقێ دگه‌ل ئه‌ڤغانستانێ بۆ خه‌لكێ كوردستانێ دیار بكه‌ن . ب دیتنا من ئه‌وێن پشتى ڤه‌كێشانا هێزێن ئه‌مریكا و هه‌ڤپه‌یمانا عیراقێ مینا ئه‌ڤغانستانێ دبینن و كوردستانێ دكه‌نه قوربانیا ڤێ ڤه‌كێشانێ، كه‌فتینه دبن دیتنه‌ك و به‌رێكڤه‌دانه‌كا چه‌وت دا، چونكى هه‌رێما كوردستانێ قه‌واره‌یه‌كێ ده‌ستوورى یه و چه‌ندین رێكه‌فتن لگه‌ل عیراقێ هه‌نه و په‌یوه‌ندیێن گرنگ و ستراتیژى لگه‌ل هژماره‌كا وه‌ڵاتێن زلهێز و سازیێن نیڤ ده‌وله‌تى هه‌نه، هه‌ر وه‌سا به‌رژه‌وه‌ندێن سیاسى و ئابوورى یێن زۆر وه‌ڵاتان دگه‌ل قه‌وارێ هه‌رێما كوردستانێ نه، له‌وما بساناهى نیه ده‌ستا لڤان به‌رژه‌وه‌ندا به‌رده‌ن . ئه‌گه‌ر مه‌ترسیه‌ك لسه‌ر هه‌رێما كوردستانێ هه‌بیت پشتى ڤه‌كێشانا ئه‌مریكا، دێ حه‌شدا شه‌عبى بیت، ئه‌ڤ چه‌نده ژى جهێ مه‌ترسیێ نیه چونكى حه‌شدا شه‌عبى ب پڕاكتیك ده‌سهه‌لاتدارا عیراقێ یه و پڕ چه‌گدارترین هێزا له‌شكرى یا ده‌وله‌تا عیراقێ یه ، ئه‌ڤه ژى یا جودایه لگه‌ل ئه‌ڤغانستانێ كۆ هێزه‌كا له‌شكرى و ئایدیلۆژیه‌كا جودا هاتنه سه‌ر ده‌ستهه‌لاتێ . پێشمه‌رگه‌هێن كوردستانێ ژى وه‌كى هێزه‌كا باوه‌رپێكه‌ر لسه‌ر ئاستێ نیڤ ده‌وله‌تى و خودان ئه‌زمۆنه‌كا چه‌ندین سالى و ووڕه هه‌ست بلند لایێ نه‌ته‌وى و نشتیمانى ، نه‌یا ب ساناهى یى به‌رامبه‌ر حه‌شدا شه‌عبى بشكێت، هه‌ر وه‌كى ل پیلانا خیانه‌تكاریا 16 ێ ئكتۆبه‌را سالا 2017 داستانێن مه‌زن به‌رامبه‌ر وان و له‌شكرێ عیراقێ و میلیشیانێن وه‌ڵاتێن هه‌رێمى تۆماركرن. خه‌لكێ كوردستانێ ژى ئه‌و خه‌لكه ئه‌وێ باوه‌رى ب دۆزا خۆ یا سیاسى و قه‌وارێ هه‌رێما كوردستانێ هه‌ى و یێ به‌رهه‌ڤه د دژوارتریت كاودان دا به‌ره‌ڤانیێ لڤان ده‌سكه‌فتا بكه‌ت كۆ جیهانێ نه‌چار بكه‌ت لسه‌ر بهێنه ده‌نگ. راسته لسه‌ر ئاستێ كارگێرى، ژبه‌ر گه‌نده‌لیێ و نه‌دادوه‌ریێ گله و گازنده و تیبینى هه‌نه، لێ دگه‌ل ئیدارا ده‌سهه‌ڵاتى به‌رى یا ئه‌ڤغانستانێ ناهێته به‌راوردكرن و لڤێره ب دیده‌ڤانیا سازیێن نیڤده‌وله‌تى و هه‌ڤپه‌یمانا ڤێ كابینا حكومه‌تێ گاڤێن باش بۆ به‌هنگاریا گه‌نده‌لیێ و سه‌روه‌ریا یاسایێ و دادوه‌ریێ هاڤێتینه و كه‌فتینه د وارێ پڕاكتیزه‌كرنێ دا . یا ژڤێ هه‌میێ گرنگتر هه‌رێما كوردستانێ سه‌ركردایه‌تیه‌كا وێره‌ك و باوه‌رپێكه‌ر هه‌یه كۆ هه‌رده‌م ل پێشیا سه‌نگه‌رانه بۆ به‌ڕه‌ڤانیكرنێ ل وه‌لات و ده‌سكه‌فت و ماف و ئارمانجێن گه‌لێ خۆ ب رێبه‌رى و پلان و ڕێنمایى یێن سه‌رۆك مه‌سعود بارزانى. جوداهیه‌كا دیتر یا كوردستان دگه‌ل ئه‌ڤغانستانێ ئه‌وه كوردستان خودان پرسه‌كا نه‌ته‌وى و نشتیمانى و جۆگرافى و دیرۆك و كلتۆره‌كێ تایبه‌ته، ئه‌وا ئه‌ڤغانستانێ تنێ گۆڕینا سیسته‌مێ ده‌سهه‌لاتداریێ یه. له‌وما خه‌لكێ كوردستانێ پشتراست دكه‌ین كۆ بڤه‌كێشانا ئه‌مریكا و هه‌ڤپه‌یمانا مه‌ترسى لسه‌ر كوردستانێ چێنابیت و دبیت ببیته ئه‌گه‌رێ بهێزتربوونا كوردستانێ چونكى پێشبینى دهێته‌كرن له‌شكرێ ئه‌مریكا و هه‌ڤپه‌یمانان پشتى ڤه‌كێشانێ ل عیراقێ ل هه‌رێما كوردستانێ بنگه‌هێن مه‌زنتر دابنێن و دویكێلا ئاگرێ شه‌رێ ئه‌ڤغانستانێ ناگه‌هیته كوردستانێ، نه‌ك كۆپیبوونا ئه‌زمۆنا وان لڤێره. لێ مه‌رجێ سه‌ره‌كى بۆ پاراستن و بهێزبوونا قه‌وارێ هه‌رێما كوردستانێ، ئێكرێزیا هێز و ئالیێن سیاسى یێن كوردستانى و ئه‌نجامدانا چاكسازیێن بنه‌ڕه‌تى و سه‌روه‌ریكرنا یاسایێ و به‌رپاكرنا دادوه‌ریێ یه , ئه‌ڤه ژى دهێته چاڤه‌رێكرن . ئەم هەواڵە 12499جار خوێندراوەتەوە |
پێناسە | گەلەری | ئەرشیف | پەیوەندی
پێبژاردنی پۆلیسی هاتووچۆ هەولێر | دهۆک | سلێمانی
هەموو مافەکان پارێزراون بۆ ئاژانسی هەواڵی زاگرۆس
Developed By: Omed Sherzad