2020-02-03 [01:14 AM]

ZNA- Hewlêr

Wezareta Berevaniyê ya Tirkiyê ragihand, di encama êrîşa bi topan a bo ser hêzên leşkerî yên wî welatî de li Idliba Sûriyê, 4 leşkerên Tirkiyê hatin kuştin û 9 leşker jî birîndar in.

Li gor ajansa nûçeyan a Anadoluyê ku ajansa dewletî ya Tirkiyê ye, artêşa Sûriyê îro 3ê Sibatê li nêzîkî 2 kîlometriya rojavayê qezaya Seraqib a ser bi parêzgeha Idlibê ve, xaleke kontrolê ya Artêşa Tirkiyê topbaran kiriye.

Şêwirmendiya Ragihandin û Têkiliyên bi Xelkê re ya Wezareta Berevaniya Tirkiyê jî derbarê êrîşê de daxuyanî daye û ragihandiye, artêşa Sûriyê bi topan êrîşî hêzên Tirkiyê ku bo Idlibê hatibûn şandin, kiriye û di encamê de 4 leşkerên Tirkiyê hatine kuştin û 9 leşker jî birîndar bûne.

Li gor daxuyaniyê, rewşa yek ji birîndaran giran e.

Di daxuyaniyê de herwiha tê gotin, ku hêzên Tirkiyê bersiva hêzên Sûriyê dane û hejmarek cih û navendên wan hêzan hatine jinavbirin.

Artêşa Sûriyê êrîşeke berfireh bo ser parêzgeha Idlibê dest pê kiriye ku di jêr kontrola komên çekdar ên dijbereyê de ye û li gor rêkevtina Sûçî ya di navbera Tirkiye û Rûsyayê de, 12 xalên leşkerî yên çavdêriyê yên Tirkiyê jî li ser sînorê wê herêmê hene, ku yek ji wan xalan li rojavayê Helebê, yek li bakurê Hemayê û 10 xal jî li sînorê parêzgeha Idlibê ne.

Di encama êrîşên berdewam ên artêşa Sûriyê ve ku Rûsya bi balafirên xwe yên cengî piştgiriyê lê dike, heta niha 4 xalên çavdêriyê yên Tirkiyê ketine nav sînorê desthilata hikûmeta Sûriyê û di jêr dorpêça hêzên artêşa Sûriyê de ne.