2020-02-03 [01:08 AM]

ZNA- Hewlêr

 Wezîrê Derve yê Belçîkayê, Philippe Goffin bi serdaneke fermî gihîşt Herêma Kurdistanê.

Peyamnêrê Rûdawê ragihand, Wezîrê Derve yê Belçîkayê gihîşt Balafirxaneya Navdewletî ya Hewlêrê û ji aliyê Wezîrê Pêşmerge Şoriş Îsmaîl û rayedarên din ên Herêma Kurdistanê ve hate pêşwazîkirin.

Philippe Goffin dê li Hewlêrê bi Serokê Herêma Kurdistanê Nêçîrvan Barzanî û Serokwezîrê Herêma Kurdistanê Mesrûr Barzanî re bicive.

Di hevdîtinên xwe yên li gel rayedarên Kurdistanê de, Wezîrê Derve yê Belcîkayê dê têkoşîna li dijî DAIŞê û terorê bi giştî, rewşa Iraqê û têkiliyên Bruksel-Hewlêrê gotûbêj bike.

Philippe Goffin beriya ku serdana Hewlêrê bike, her îro serdana Bexdayê jî kiribû û bi Wezîrê Derve yê Iraqê Mihemed Elî Hekîm re hevdîtin pêk anî.

Philippe Goffin beriya du mehan ew post wergirtiye û li Hewlêrê wê li gel serkirdayetiya Herêma Kurdistanê şerê DAIŞê û Pêşhatên dawiyê yên navçeyê gotûbêj bike.

Hikûmeta Belcîkayê dibêje, ew bi hemû awayekî rê li tundrewiyê digire û welatê xwe ji gefên DAIŞê diparêze.

Goffin di 30 Mijdarê de postên Wezareta Derve û Wezareta Berevaniyê ya Belckayê werigirtiye.