2019-05-18 [04:39 PM]

Hewlêr (ZNA) -

Du partiyên Kurdistanî ên Bakurê Kurdistanê PAK û PSKê li ser dozên girtina partiyên xwe li bajarê bakurê Kurdistanê daxuyaniyek dan çapemeniyê.

Partiya Azadiya Kurdistanê (PAK) û Partiya Sosyalîsta Kurdistanê (PSK) daxwaz ji raya giştî ya Kurdistanê û sazî û dezgehên sivîl dikin, beramberî egere girtina partiyên Kurdistanî helwest bigrin û hevkariya wan bikin. PAK û PSK dibêjin, ewê li dijî egera girtina partiyên xwe dest bi kampanyayeka berfireh bikin.

Serdozgeriya Komarî ya Dadgeha Bilind a Tirkiyeyê navê partiyên ku bêjeya Kurdistanê di navê wan de cih digire ji lîsteya partiyên siyasî derxistiye û ji bo Partiya Azadiya Kurdistan, (PAK) Partiya Sosyalîsta Kurdistan(PSK) û Partiya Demokrata Kurdistan a Tirkiyeyê (PDK-T) Partiya Komînîstên Kurdistanê (KKP) jî daxwaza girtinê kiriye.

Serokê Giştî yê PSKê Mesûd Tek di konferanseke rojnamevanî de dijî wê helwêsta dozgerên Tirkiyê axivî û got: “Dewleta Tirkiyê ji damezrandina xwe ve hebûna kurd û welatê wî înkar kiriye. Bersiva hemû daxwazên netewe, demokratîk û rewa daye ber tank û topan. Pişaftina gelê kurd, sirgûnkirina kurdan, wêrankirina gundên kurdan, komkujî û jenosîd bûne bingeha siyaseta dewleta Tirkiyê di pirsa kurd û Kurdistanê de û dimeşîne.”

Tek dibêje ne ku wan Kurdistan afirandiye Kurdistan welatê kurdan e û wiha axivîye: “Em tekeziyê li ser vê yekê dikin, ne me kurd û Kurdistan afirandiye, netewa kurd yek ji kevintirîn neteweyên Rojhilata Navîn e û Kurdistan jî navê welatê wî ye. Tiştê ku me kiriye ew e, me rastiya kurd û Kurdistanê bi navê xwe aniye ziman û ji bo çareserkirina pirsa kurd û Kurdisatanê, pêşniyazên demokratîk û aştîxwaz pêşkêş kirine. Gûman tê de nîn e ku çareserkirina pirsa bi awayekî dadperwerane li ser bingeha wekheviya her du milatan li Tirkiye û herêmê, rê li ber demokrasî, aramî û aştiyê xweş dike.”

Herwiha got jî: “Partiya me ji bo bicihkirina armancên xwe riyên demokratîk û rewa dane ber xwe, li ser çareserkirina pirsgirêkan bi awayekî aştiyane rijd bûne, her dem ji riyên tundûtûjiyê dûr bûne, ders û pebdên derbasbûyî nîşan didin ku zulim, zor û tundî, qedexekirin û daxistina partiyan ti caran pirsên Tirkiyê çareser nekirine û ji îro û pê ve jî çareser nake. Riya çareseriyê bi ferehalî û demokrasiyê li Tirkiyê, bicihkirina hiqûqa navnetewî bi amadekirina desta pirnetewî û pirolî geştir û xweştir dibe. Herwiha hebûn û mafê Kurdan yên li ser bingeha wekhevî bên pejirandin, heger bi vî awayî be, pêwîst nake êdî partî bên daxistin.”