2019-04-22 [10:32 AM]

Hewlêr (ZNA) -

Di encama operasyonekî hêzên Iraqê yên li zincîre çiyayên Hemrînê de, emîr û terorîstekî metirsîdar ê DAIŞê hate kuştin ku destê wî di gelek kiryarên terorîstî de hebûye.

Li gor daxuyaniya saziya dijî teror a Iraqê, hêzên dijî teror a Iraqê, terorîstekî bi navê Nîhad Ehmed Ebdulselam Kurewî li zincîre çiyayê Hemrînê kuştine û ew terorîstê hatiye kuştin xelkê bajarokê Gulale ango Celewla ya ser bi Xaneqînê ye.

Daxuyaniyê de hat gotin, terorîstê hatiye kuştin berpirsê asayîşa giştî yê nav eyaleta Diyala bûye, herwaha berpirsê plan kirina kiryarên terorîstî bûye li çarçoveya parêzgeha Diyala, Kerkûkê û gelek kiryarên terorîstî li Xaneqîn, Gulale û Qeretepeyê pêkanîne. Herwaha berpirsê revandina hemwelatiyan bûye li ser rêya navbera Kerkûk – Bexda û piştî çavdêriyeke bi hûrgilî saziya dijî teror a Iraqê, bi hemahengiya li gel hevpeymaniya navnetewî ve kariye wî bikuje.