2019-04-16 [01:22 PM]

Hewlêr (ZNA) -

Serokwezîrê Herêma Kurdistanê Nêçîrvan Barzanî daxwaza parastina jîngehê ji hemû Kurdistaniyan kir û ragihand, divê her kes di xema jîngehê de be.

Îro li Hewlêrê bi helkefta roja jîngehê, merasimek hat lidarxistin. Di wê merasimê de Serokwezîr Nêçîrvan Barzanî axaftinek kir û behsa girîngiya parastina jîngehê û metirsiyên pîsbûna wê kir.

Nêçîrvan Barzanî herî zêde behsa jîngeha Kurdistanê kir û got, dijminên gelê Kurdistanê gelek hewl dan jîngeha Kurdistanê wêran bikin û di vî warî de çi ji destê wan hatiye, kirine.

Nêçîrvan Barzanî anî ziman ku rêjîma Beisî ya Iraqê bi hezaran çem û kanî, bax û deverên Kurdistanê bi gazên kîmyayî û çekên cur bi cur pîs kiriye û heta niha jî bandora wê yekê li ser jîngeh û xelkê Kurdistanê maye.

Serokwezîrê Herêma Kurdistanê da xuyakirin ku di mijara parastina jîngeha Kurdistanê de gavên baş hatine avêtin û pilanên hikûmetê jî di vî warî de hene û daxwaz ji xelkê Kurdistanê kir jîngehê biparêzin û hemû di xema jîngeha welatê xwe de bin.

Nêçîrvan Barzanî her wiha bang li gelê Kurdistanê kir, daran biçînin û bo xweşkirina jîngehê çi ji desetê wan tê bikin.