2019-02-27 [12:49 PM]

Hewlêr (ZNA) -

Bîrmendê Fransî Bernard-Henri Levy di behsa naveroka pirtûka xwe ya nû “Împarator û Pênc Padîşah” dike.

Bîrmendê Fransî Bernard-Henri Levy ji K24ê re ragahand: “Sala 2017an li Kurdistanê bûm û min bi çavê xwe ew erdheja jeopolîtîkî ya 16ê Cotmehê li Kerkûk û piştre li Pirdê dît. Amerîka û cîhana demokrat û azad pişta xwe dan Kurdan û li ser sêniyeke zêrîn Kurd ji Îran û Heşda Şeibî re hîştin.”

Herwaha got: “Min bi çavê xwe dît ku li ber çavê Amerîka û Ewropa xiyanet li Kurd hate kirin û Tirkiye û Îran bi awayekî axivîn û serederî kirin, ku tiştek li ser vî erdî bi navê Amerîka û Ewropayî nîne. Li wir bîrokeya vê pirtûkê hate serê min, ji ber wê jî vê pirtûkê pêşkêşî Kurdan dikim.”

Levy behsa wê demê dike û dibêje: “Min bi çavê xwe dît çawa Heşda Şeibî ya Îranê li tanka Abrams a Amerîkî siwar bûne û rûbirûyî nêzîktirîn dosta Hevpeymaniyê û Amerîka û welatên rojava dibin.”

Ew bîrmendê Fransî amaje bi zîrekiya Pêşmerge û hişmendiya Serok Barzanî dike, ku çawa bi hişmendî ew plan şikandin û got: “Kurdistan bûye paytexta berxwedan û şerê li dijî DAIŞê, rast e hevpeymanan alîkariya Kurdan dikirin. Lê li ser erdê ew bi tenê bûn û rûbirûyî DAIŞê dibûn. Bi xwîna xwe berevanî li xaka xwe û zarokên min, te û hemû xelkê rojava dikirin. Lê di demekê de hemû tişt hat guhartin û Amerîka diyar nebû. Dema min dît Abrams di destê milîsên ser bi Îranê de ye û li Pirdê êrîş dostê me Kurdistanê dike, têgihîştim ku tiştekî xirap dê pêkbê û pişt li Kurd hate kirin.”

Levy dibêje: “Heger Împarator ku Amerîka ye ji navçê vekişe, wê demê padîşahên wek Rûsya, Çîn, Siûdiye, Tirkiye û Îran dê navçê bikin cihek ku jiyan û ewlehî lê peyda nabe.”

Levy ecêbmana xwe ji wê dîmenî bibîr tîne, ku çawa Pêşmerge di şerê li dijî DAIŞê û parastina demokrasiyê li cîhanê kir û careke din heman Pêşmerge li 25ê Îlonê li binkeyên dengdanê dît ku çek daniye û deng dide serxwebûna welatê xwe.”

Ew bîrmendê Fransî di dawiyê de dipirse: “Ma ti miletek li ser erdê heye, biqasî Kurd aştîxwaz û demokrat be?”