2018-12-10 [07:52 PM]

Hewlêr (ZNA) -

Balyozê Tirkiyê li Iraqê dibêje, ji ber PKKê pêwendiyên Tirkiyê û YNKê xirab bûye ji ber wê jî divê YNK bi yekcarî PKKê ji navbera xwe û Tirkiyê de derxîne!

Balyozê Tirkiyê li Iraqê Fatîh Yildiz, ji ajanseka turkmenî re behsa helwesta vê dawiyê ya YNKê li hember PKKê kiriye û gotiye, YNKê dest bi girtina baregehên Tevgera Azadî ya girêdayî PKKê kiriye. Divê YNK vî karî bi awayekî micid û rast bike.

Fatîh Yildiz her wiha gotiye, her gava berpirsên Silêmaniyê tiştekî wisa kirin û PKK bi yekcarî ji wir derxistin wê çaxê Tirkiye dê qedexeya li ser firokexaneya Silêmaniyê betal bike.

Balyozê Tirkiyê li Iraqê daye xuyakirin, PKK bûye sebeba têkçûna pêwendiyên Tirkiyê û YNKê ji ber wê jî divê ew PKKê ji navbera xwe û Tirkiyê derxînin.

Meha borî cîgirê serokê hikûmeta Kurdistanê Qubad Talebanî fermana girtina baregehên Tevgera Azadî yên li Silêmaniyê da, paşê tevahiya baregehên wê saziya PKKê hatin girtin.