2018-12-03 [09:49 AM]

Hewlêr (ZNA) -

Berdevkê Hêzên Çekdarên Îranê ragihand, ew dê li ser ceribandin û pêşxistina mûşekên xwe berdewam bin û diyar kir, bernameya mûşekî ya Îranê tenê jibo berevaniya li wî welatî ye û bi gotina wî, ji ber wê sedemê jî dê ceribandin û pêşxistina mûşekan ji aliyê Tehranê ve berdewam be.

Li gorî nûçeya ajansa Tasnim, ku ser bi Supaya Pasdaran a Îranê ve ye, Berdevkê Hêzên Çekdarên Îranê General Ebulfezl Şikarçî îro da xuyakirin, ku Tehran dê li ser bernameya xwe ya mûşekî û pêşxistina wê berdewam be.

General Ebulfezl Şikarçî li hember helwêstên welatên ewropî û Amerîkayê û civaka navdewletî bi giştî yên di derbarê ceribandina mûşekan û bernameya mûşekî ya Îranê bertek nîşan daye û diyar kiriye: “Ceribandina mûşekan û şiyana berevaniyê ya Komara Îslamî jibo parastinê û di çarçoveya siyaseta berevaniya Îranê de ye, lewma ew kar dê berdewam be.”

Ebulfezl Şikarçî gotiye, ew dê him cerdibandin û him jî pêşxistina bernameya xwe ya mûşekî berdewam bikin.

Berdevkê Hêzên Çekdarên Îranê destnîşan kiriye, ew mijar ne di çarçoveya danûstandinên li gel welatên ewropî û Amerîkayê de ye û tekez kiriye, ku mijara bernameya mûşekî girêdayî “asayişa netewî ya Îranê” ye û di vê derbarê de ew “ruxsetê ji ti welatî” wernagirin.

Ebulfezl Şikarçî herwiha got, bila welatên li herêmê piştrast bin, ku bernameya mûşekî ya Îranê û ceribandina mûşekan ji aliyê hêzên Îranê ve tenê jibo parastina ewlehiya Îranê ye û da zanîn, ku “Komara Îslamiya Îranê li dijî ti welatekî herêmê tevnagere û berjewendiyên wan naxe metirsiyê.”