2018-12-02 [02:09 PM]

Hewlêr (ZNA) -

Serokê Hevpeymaniya Dewleta yasa aşkera kir ku li gel serok Barzanî guftûgo derbarê referandûma serxwebûna Kurdistanê de kiriye û got: ‘’Barzanî li ser encamên referandûmê rijd e.’’

Di hevpeyvîneke televîzyonî ya kanala fermî ya Îranê de serokwezîrê berê yê Iraqê û Serokê Hevpeymaniya Dewleta Yasa Nûrî Malikî ragehand, Iraq ji ber neseqamgiriya siyasî û milmilaneya di navbera aliyên siyasî dinale û ti rêkeftinek siyasî di navbera grub û aliyan de tine ye û seqamgiriya ewlehî, aborî û civakî jî li Iraqê ava nebûye.

Nûrî Malikî derbarê serdana dawiyê ya serok Barzanî ya ji bo Bexdayê û hevdîtina xwe ya li gel jî axift û got: ‘’Barzanî hîn li ser helwêstê derbarê referandûma serxwebûna herêma Kurdistanê de rijd e. Ti paşde kêşanek jî nekiriye û heman biryara xwe ya destpêkê ku dane li ser wê jî bi rijd in.’’

Malikî got: ‘’Ew gotin raste ku pêwîstiya Iraqê bi herêma Kurdistanê heye û berevajî wê jî raste. Meyl û daxwaza herêma Kurdistanê ya bo vegera Bexdayê û rêkeftin û alîkarî li gel hikûmeta nû li holê ye. Herçend derbarê paşde vekêşan û dest jê berdana encamên referandûmê de ti axaftinek nehatibe kirin jî, lê wan dest ji rê û armancên referandûma serxwebûna herêma Kurdistanê bernedane.’’