2017-06-18 [11:47 AM]

Hewlêr (ZNA) -

Hêzên pêşmerge li navçeya Xurmatû bi tundî bersiv dan êrîşa çekdarên DAIŞê. Di encama pevçûnê de 4 çekdarên DAIŞê yên xwekuj hatine kuştin û pêşmergeyek jî birîndar bû.

Îro yekşemê 18-6-2017, demjimêr 04:00ê destê sibê, li rojavayê navçeya Xurmatû, 4 çekdarên DAIŞê yên xwekuj êrîşî baregaha Fewca 4 a Lîwaya 16 a Hêzên Pêşmerge kirin.

Li gorî gotina pêşmergeyên Fewca 4, di dema êrîşê de zêdetirî 2 demjimêran pevçûn derketiye û paşî çekdarên xwekuj xwe gihandine jûrekê fewcê û pêşmergeyan jî ew dorpêş kirine. Di dema dorpêçê de çekdaran xwe teqandine.

Hate gotin, ku çekdarên êrîş kirine pakistanî û endonezî bûne.

Peyamnêrê Rûdawê Hîwa Husamedîn ragihand: “Di vê êrîşê de tenê pêşmergeyek birîndar bûye. Herwiha piştî vê êrîşê Hêzên Pêşmerge li herêmê dest bi operasyonê kirine.”

 Navçeya Xurmatû ji aliyê îdarî ve girêdayî parêzgeha Selahedîn a Iraqê ye û 100 kîlometreyan ji nevanda bajarê Tikrîtê dûr e.

Hejmara rûniştvanên Xurmatûyê bi gund û bajarokên derdorê ve nêzîkî 220 hezar kes e û ji sedî 60 kurd in, ji sedî 25 tirkmen û ji sedî 15 jî ereb in.