2017-06-18 [10:35 AM]

Hewlêr (ZNA) -

Li Portugalê agirek mezin berbû daristanên wî welatî û di encamê de 62 kesan canê xwe ji dest dan û gelek kes jî di encama şewatê de birîndar bûne.

Li gorî nûçeya AFPê, îro yekşembiyê 18ê Hezîranê agirek mezin bi daristanê welatê Portugalê ketiye û li gorî zanyariyan, heta niha di encama şewatê de, 62 kesan canê xwe ji dest dane.

Herwiha zêdetirî 90 kes jî di encama bûyera agirberbûna daristanan de birîndar bûne û tîmên hawarçûnê kesên birîndar veguhastine nexweşxaneyan.

Ji ber hejmara zêde ya qurbaniyên şewatê, hikûmeta Portugalê li wî welatî 3 roj weke şîna (taziya) giştî ragihandiye.

Hikûmeta Portugalê zêdetir ji 1,700 karmendên agirvemirandinê erkdar kirine û hejmareke zêde ya otomobîl û wesayitên taybet bi agrivemirandinê bo kontrolkirina agir jî şandine cihê bûyerê.

Di encama agirberbûna darsitanan de, rûbereke berfireh a daristanên Portugalê û herwiha xanî û avahiyên derorê û otomobîlê welatiyan jî şewitîne.

Serokwezîrê Portugalê Antonio Costa, bûyera agirberbûna daristanên wî welatî weke trajediyeke mezin bi nav kir û ragihand: “Di wan çend salên dawiyê de, agirek bi vî awayî mezin û berfireh li Portugalê çê nebûye.”

Hikûmeta Portugalê soz daye, ku hewlên xwe bo kontrolkirina agir berfirehtir bike û hejmara tîmên agirvemirandinê û hawarçûnê li herêma şewatê jî zêdetir bike.

Ji roja şembiyê 17ê Hezîranê ve, şepêleke bihêz a germiya hewayê berê xwe daye Portugalê û li hin navçeyên wî welatî pileya germiya hewayê ji 40 pileyî zêdetir bûye.