2016-11-29 [12:36 PM]

Hewlêr (ZNA) -

Fermandarê bilind ê hêzên Brîtanyayê li Iraq û Sûriyê general Rupert Jones ragihand, “Şerê DAIŞê bi lezûbez nabe. Divê fermandarên iraqî bi serbr û bêhnfireh bin.”

General Rupert Jones di wê baweriyê de ye ku ji bo derxistina DAIŞê ji nav Iraqê pêwîstî bi demek dirêj heye û dibe ku şerê li Iraqê jî heta naverasta sala 2017ê berdewam bike.

Rupert Jones ji rojnameya The Guardian a welatê xwe re axivî û diyar kir, ku di dema kontrolkirina bajarê Minbicê de nêzîkî 10 hezar belgeyên DAIŞê hatine desteserkirin û di wan belgenameyan de derbarê êrîşên DAIŞê yên li Ewropa û rêxistina wan a welatên cuda yên cîhanê de, agahiyên giring ketine dest.  

Jones dibêje bi kontrolkirina Mûsilê dê zanyariyên giringtir jî derkevin holê.

Fermandarê bilind ê hêzên Brîtanyayê li Iraq û Sûriyê general Rupert Jones daxuyand ku rêxistina DAIŞê ji sedî 56ê axa Iraqê û ji sedî 28ê axa Sûriyê ya di bin dagirkeriya xwe de wenda kiriye û got; “Lê hê jî di Mûsilê de bi hovane şer dike. Li kolanên Mûsilê serê xelkê dibire û wan davêje nav bîrên petrolê.”

Fermandarê brîtanî dibêje operasyona navçeya Tileferê dibe bimîne piştî kontrolkirina Mûsilê û herwiha di wê baweriyê de ye ku dê vê care hêzên hevpeymanan zû bi zû ji Iraqê dernekevin.