2016-09-15 [12:03 PM]

Hewlêr (ZNA) -

Kirîstiyanên Deşta Neynewayê (Mûsilê) daxwaza zû kontrolkirina deverên xwe û derxistina cih û warên xwe ji destê DAIŞê dikin.

Bi destpêkirina şerpêla êrişên DAIŞê li Iraqê û girtina bajarê Mûsilê di sala 2014 de, çekdarên wê rêxistina tundrew a îslamî êrişî deverên cihê akincîbûna Kirîstiyanan li Deşta Neynewayê jî kirin.

Ji ber êrişên DAIŞê û kontrolkirina gund, bajarok û bajarên wan, niha Kirîstiyanên wan cihan aware û koçber bûne û pirraniya wan li Herêma Kurdistanê hatine bicihkirin û hejmarek jî xwe gihandine Ewropayê û welatên rojavayî.

Bi derbasbûna zêdetir ji 2 salan bi ser kontrolkirina wan deveran ji aliyê DAIŞê ve û derbaskirina jiyana awareyiyê û di nav kampan de, welatiyên Kirîstiyan ji rewşa jiyana xwe nerazî ne û bêzariya xwe nîşan didin.

Welatiyên Kirîstiyan daxwaz dikin, ku deverên wan di demek herî zû de ji kontrola DAIŞê bihê derxistin.

Xelkê Kirîstiyan çavê wan li guhertinên herêmê ye û hêvî dikin, ku piştî DAIŞê jiyaneke aram û parastî ji wan re bihê dabînkirin.

Ew daxwaz û hêviya Kirîstiyanan di demekê de ye, ku fermandeyekî Artêşa Amerîkayê ragihand, ku şerê Mûsilê dê di meha dahatî de dets pê bike.