2016-07-11 [09:18 AM]

Hewlêr (ZNA) -

Wezareta navxwe ya Iraqê di daxuyaniyekê de ragihand, di encama teqîna bombeyeke çandî de li herêma Seyidiye li başûrê bajarê Bexdayê 1 kes hat kuştin û 6 kes birîndar bûn.

Herwiha teqîneke din li devera Sebh Bor li bakurê Bexdayê çê bû û di encama vê teqînê de jî 3 kes hatin kuştin û 8 kesên din jî birîndar bûn.

Herwiha li bajarokê Letîfiye li başûrê Bexadyê jî bombek bi konvoyeke Artêşa Iraqê ve teqiya.

Li gorî zanyariyan, di encama vê teqînê de serbazekî iraqî hat kuştin û 4 serbazên din birîndar bûn û zirarek mezin jî gihîşt otomobîlên leşkerî yên Artêşa Iraqê.

Roja şemiyê jî zincîreyek teqîn paytexta Iraqê bajarê Bexdayê hejandibûn û di encamê de zêdetirî 20 kesan bibûne qurbanî.

Zêdebûna hejmara teqînan li Bexdayê di demekê de ye, ku hejmara qurbaniyên teqîna roja 3ê Tîrmehê li Taxa Kerade ya Bexdayê zêdetir dibe û xelkê Iraqê hêj ji ber wê teqînê de di şokê de ne.

Hejmara kuştiyên teqîna li Kerade nêzîkî 300 kesî bûye û herwiha zêdetirî 200 kesan jî di encama wê teqînê de birîndar bûne.