2016-07-10 [10:37 AM]

Hewlêr (ZNA) -

Li paytexta Iraqê Bexdayê, li nêzîkê Herêma Kesk li dijî hikûmetê xwepêşandanek hate kirin û xwepêşanderan Ala Iraqê şewitandin.

Doh şev li taxa Kesk a Bexdayê li dijî hikûmetê xwepêşandanek hate kirin. Bi sedan kesên ku hatine gelhev daxwaza reformên bingehîn û jinavbirina gendeliyê kirin.

Di dîmenên xwepêşandanê de jî tê dîtin ku xwepêşander bi hers û acizî deriyê Herêma Kesk dişkînin û behsa gendeliyên hikûmetê û partiyên siyasî dikin.

Di dema xwepêşandanê de girseya bi hers, bi tevê destwerdana hêzên ewlekariyê jî Ala Iraqê dişewitînin.

Di meha Nîsana îsal de xwepêşandanên li dijî hikûmet û rêveberiya Bexdayê zêdebibûn. Di dawiya meha Nîsanê de jî xwepêşanderan Parlamentoya Iraqê dagir kiribûn.

Serokê Tevgera Sadir, Muqteda el-Sadir daxwaz ji xwepêşanderan kiribû ku tundiyê bikarneynin.