2016-05-23 [12:04 PM]

Hewlêr (Rûdaw) - Serokwezîrê Iraqê, Heyder Ebadî ragihand ku operasyona bidestxistina bajarê Fellûceyê destpê kir û artêşa Iraqê bang li rûniştvanan kir ku bajêr beriya şer biterikînin.

Ebadî li ser Twitterê, zûyê sibeha Duşemê got: "Saeta sifir ji bo rizgarkirina Fellûceyê hat. Dema serfiraziya mezin nêzîk e û Daişê tu vebijêrk nîne ji bilî revê."

Fellûce, ku nêzî 300 hezar kes lê dijîn û dikeve 50 kîlomêtr rojavayê paytext Bexdayê, bajarekî li ser parêzgeha Enbarê ye û ji yekem meha 2014ê ve di destê DAIŞê de ye.

Di tweeteke din de Serokwezîrê Iraqê got "bi bereketa Allah û piştbestina me bi wî ve, em dest bi rizgarkirina Fellûceyê dikin. Û serfirazî tenê ji aliyê Allah tê."

Li gorî Reutersê, Ebadî diyar kiriye ku artêş, polîs, hêzên dijetîrorê, şervanên eşîrên sunne û milîsên şîe ku wekî Heşdî Şe'bî tên nasîn dê beşdarî operasyonê bin. Herwiha dê hevpeymaniya dijî-DAIŞê ya bi serkirdetiya Amerîkî jî dê piştgiriya asmanî bide.

Artêşê û milîsên Şîe ji par ve Fellûce dorpêç kiriye. Li gorî Cîgirê Encûmena Bajarê Fellûceyê Falih el-Essawî, li navenda bajêr 75 hezar sivîl mane û DAIŞ nahêle ew derkevin.